ފަލަސްތީންގެ ބިންތަކުން ފޭބުމަށް އިޒުރޭލަށް އެއް އަހަރު

ހަސަން ހަލީމް

19 ސެޕްޓެމްބަރ 2024 - 12:29

0 comments

އިސްރާއީލުގެ ބިންތައް އިސްތިއުމާރުކޮށް ހިންގަމުންދާ ޖަރީމާތައް ކުށްވެރިކޮށް އެކަންކަން ހުއްޓުވުމަށް އދގެ އާންމު މަޖިލީހަށް ހުށަހެޅި ގަރާރަށް ތާއީދުކޮށް ދިވެހިރާއްޖެއިން ވޯޓު ދީފި އެވެ.

މި ގަރާރުގައި އިޒުރޭލަށް ގޮވާލާފައިވަނީ ޔަހުދީ އިސްތިއުމާރީ ބާރުތަކުން ހިސާރުކޮށްފައި އޮތް ފަލަސްތީންގެ ބިންތަކުން އެއް އަހަރު ތެރޭގައި ޔަހޫދީން ފައިބައި ފަލަސްތީނާ ބިންތައް ހަވާލުކުރުމަށެވެ.

މިއީ ފަލަސްތީނުން އިސްނަގައިގެން އާންމު މަޖިލީހަށް ވެއްދި ގަރާރެކެވެ. މި ގަރާރަށް 124 ގައުމަކުން ތާއީދުކުރި އެވެ. އަދި 14 ގައުމަކުން ދެކޮޅު ހެދި އެވެ. 43 ގައުމަކުން ވަކިކޮޅަކަށް ނުޖެހެ އެވެ.

ފަލަސްތީންގެ މި ގަރާރަށް ތުރުކީގެ އެއްބާރުލުން ވަރަށް ބޮޑަށް ލިބުނެވެ. އަދި އާންމު މަޖިލީހަށް މި ގަރާރު ވެއްދުމަށް 50 ގައުމަކުން އެހީތެރިވި އެވެ.

މި ގަރާރު ބާރުއަޅަނީ 1967 ވަނަ އަހަރު އިޒުރޭލުން ވެރިވެގަތް ބިންތައް ދޫކޮށްލުމަށެވެ. އަދި ފަލަސްތީންގެ ބިންތަކުގައި ޔަހޫދީން ވަޒަންވެރިކުރުން ހުއްޓުވާލައި -- ވަޒަންވެރިކޮށްފައި ހުރި ބިންތައް ދޫކޮށްލުމަށްވެސް ވަނީ ގޮވާލާފަ އެވެ.

މި ގަރާރާ އެއްގޮތަށް އިޒުރޭލުން އަމަލުކުރެތޭ ބެލުން ވަނީ ސެކްރެޓަރީ ޖެނެރަލްއާ މަތިކޮށްފަ އެވެ. އަދި އިޒުރޭލުގެ ހަރަކާތްތަކަށް ބަލައި ރިޕޯޓެއް އެކުލަވާލުންވެސް ވަނީ ސެކްރެޓެރީ ޖެނެރަލްއާ ހަވާލުކޮށްފަ އެވެ.

އެ އިސްތިޝާރީ ލަފާގައި ފާހަގަކޮށްފައިވާ ގާނޫނާ ހިލާފު ކަންކަން ހުއްޓުވުމަށް ގޮވައިލާ އދގެ އާންމު މަޖިލީހަށް ހުށަހަޅާފައިވާ ގަރާރަށް ރާއްޖެއިން ތާއީދުކޮށް ވޯޓުދިންކަން ހާމަކުރައްވައި އެކްސްގައި ކުރެއްވި ޕޯސްޓެއްގައި ފޮރިން މިނިސްޓަރު މޫސާ ޒަަމީރު ވިދާޅުވީ އިސްރާއީލުން ޣައްޒާގައި ހިންގަމުންދާ ގަތުލުއާންމުގެ އަމަލުތައް މިހާރުން މިހާރަށް ނިމުމަކަށް ގެންނަންޖެހޭ ކަމަށެވެ.

އަދި އިންސާނީ އެހީތެރިކަން ޣައްޒާއަށް ފޯރުކޮށްދެވޭކަން ޔަގީންކުރަންޖެހޭ ކަމަށާއި، ޖުލައި މަހު އައިސީޖީން ނެރުނު އަމުރުގައިވާ ކަންކަން އިސްރާއީލުން ފުރިހަމައަށް ތަންފީޒުކުރާކަން ގަރާރުގައި ބަޔާންކުރާ 12 މަސްދުވަހުގެ ތެރޭ ކަށަވަރުކުރަން އޭނާ ގޮވައިލެއްވި އެވެ.

އަދި އަދުލުވެރިކަމާއި ސުލްހައާއި ދައުލަތެއްގެ ހައްގު ލިބުމަށް ފަލަސްތީނު ރައްޔިތުން ކުރާ އުންމީދު ހަގީގަތަކަށް ހަދަންޖެހޭ ކަމަށް ވިދާޅުވި އެވެ. އެކަން ހަގީގަތަކަށްވާނީ ފަލަސްތީނުގެ މިނިވަން ދައުލަތް ބަލައިގަނެ 1967 ވަނ އަހަރުގެ ކުރިން އޮތް ބޯޑަރުތަކުގެ މައްޗަށް އެކުލެވޭ އިރުމަތީ ގުދުސްގައި ވެރިރަށް އޮންނަ ފަލަސްތީނެއް ގާއިމުވެގެން ކަމށްވެސް ޒަމީރު ވިދާޅުވި އެވެ.