ލަބެރަ ބޮޑީބޯޑިން ޗެލެންޖް 2024ގެ ޑިޖިޓަލް ޕާޓްނަރަކަށް ދިރާގު

ހަސަން ހަލީމް

30 ސެޕްޓެމްބަރ 2024 - 17:20

0 comments

ލަބެރަ ބޮޑީބޯޑިން ޗެލެންޖުގެ ޑިޖިޓަލް ޕާޓްނަރަކަށް ދިރާގުން ސޮއިކުރުން

ފަސް އަހަރުގެ މެދުކެނޑުމަކަށްފަހު ތިން ވަނަ ފަހަރަށް ބާއްވާ ލަބެރަ ބޮޑީބޯޑިން ޗެލެންޖްގެ ޑިޖިޓަލް ޕާޓްނަރެއްގެ ގޮތުގައި ދިރާގުން ސޮއިކޮށްފި އެވެ.

ދިރާގުން ނެރުނު ބަޔާނެއްގައި ވިދާޅުވެފައިވަނީ ލަބެރަ ބޮޑީބޯޑިން ޗެލެންޖް 2024 ގެ ޑިޖިޓަލް ޕާޓްނަރުގެ ހައިސިއްޔަތުން ދިރާގުން އަނެއްކާ ވެސް މޯލްޑިވްސް ބޮޑީބޯޑިން އެސޯސިއޭޝަނާއެކު މަސައްކަތް ކުރަން ލިބުނު ކަމީ ވަރަށް އުފާކުރާ ކަމެއް ކަމަށެވެ.

ދިރާގުގެ ބްރޭންޑް އެންޑް އިވެންޓްސް މެނޭޖަރު ނައިޔާ ޝަރީފް ވިދާޅުވީ ދިރާގުގެ ބޭނުމަކީ ރާއްޖޭގެ އެތުލީޓުންނަށް ހުނަރު ދައްކާލެވޭ އިތުރު ތަޖުރިބާތައް ހޯދައިދެވޭނެ ޕްލެޓްފޯމެއް އުފެއްދުމަށް އެހީތެރިވުން ކަމުގައެވެ.

"މިފަދަ މުބާރާތްތައް ކުރިއެރުވުމުގެ ތެރެއިން، އަޅުގަނޑުމެންގެ މަގުސަދަކީ ރާއްޖޭގެ ކުޅުންތެރިންނަށް އެމީހުންގެ ހުނަރު ދައްކާލައި، ތަޖުރިބާ ހޯދައި، އަދި ވާދަވެރި ތަޖުރިބާ ބިނާކުރުމަށް މަގުފަހިކޮށްދިނުން" އޭނާ ވިދާޅުވިއެވެ.

އެމްބީބީއޭގެ ރައީސް ހުސައިން ނިޒާމް ވަނީ ރާއްޖޭގައި ބޮޑީބޯޑިން ކުޅިވަރު ތަރައްޤީކުރުމަށް ދިރާގުން ދެއްވާ އެހީތެރިކަމާއި ވަރުގަދަ އެއްބާރުލުމަށް ޝުކުރުއަދާކޮށްފަ އެވެ.

ސެޕްޓެމްބަރު 30 އިން އޮކްޓޯބަރު 5، 2024 އަށް، މާލޭ ވަރުނުލާ ރާޅުގަނޑުގައި ލަބަރާ ބޮޑީބޯޑިން ޗެލެންޖް 2024 ކުރިއަށް ގެންދިއުމަށް ވަނީ ހަމަޖެހިފައެވެ. ހަމައެއާއިއެކު ދިރާގުން އަބަދުވެސް ކުޅިވަރާއި މުނިފޫހިފިލުވުމަށް ލޯބިކުރާ މީހުން އެއްތަނަކަށް ގެނެސް އާ ފުރުސަތުތަކެއް ހޯދައިދޭ ކަމަށާއ،ި މިފަދަ އިވެންޓްތަކަށް އަބަދުވެސް ސަޕޯޓް ދިނުމަށް ތައްޔާރަށް ތިބި ކަމަށް ވަނީ ވިދާޅުވެފަ އެވެ.