ދިރާގުން ނެޓް ޕްރޮޓެކްޓް ތައާރަފްކޮށްފި

އިސްމާއިލް ރިޒާ

29 އޮކްޓޫބަރ 2024 - 13:44

0 comments

ދިރާގު "ނެޓް ޕްރޮޓެކްޓް" ބޭނުން ކުރުމުން ރައްކާތެރި ނޫން ވެބްސައިޓުތަކާއި ލިންކުތަކުން ރައްކާތެރިކަން ލިބޭނެ އެވެ. އެގޮތުން އަމިއްލަ މައުލޫމާތުތައް ވެބްސައިޓްތަކަށް ދޭ އިރު، އެ ވެބްސައިޓަކީ ރައްކާތެރި ނޫން ވެބްސައިޓެއްނަމަ އެކަން ކަސްޓަމަރަށް އަންގާނެ އެވެ.

ދިރާގުން ބުނީ މި ހިދުމަތާއެކު ރައްކާތެރި ނޫން ވެބްސައިޓްތަކާއި ލިންކުތަކާއި ސްކޭމް އީމެއިލްތަކާއި ރަނގަޅު ނޫން ވެބްސައިޓްތަކުން ދޭ ގެއްލުންތަކުން ރައްކާތެރިކަން ހޯދޭނެ ކަމަށެވެ.

ކަސްޓަމަރަކު މި ހިދުމަތް ހޯދުމުން ރައްކާތެރި ނޫން ވެބްސައިޓާއި ލިންކްތައް ރައްކާތެރި ނޫންކަން ކަސްޓަމަރުންނަށް އަންގާނެ ކަމަށް ދިރާގުން ބުނެ އެވެ. މިހިދުމަތުގެ ތެރެއިން ބައެއް ވެބްސައިޓްތައް ބްލޮކް ކުރުމުގެ އިހުތިޔާރުވެސް ލިބޭނެ އެވެ.

ދިރާގުން ބުނީ ވަކި ވަގުތުތަކެއްގައި ވަކި ވެބްސައިޓްތަކަކަށް ނުވަތަ އެޕްލިކޭޝަންތަކަކަށް ނުވަދެވޭ ގޮތް ހަދައި ކުޑަކުދިންނަށް ފެންނަން ބޭނުންނުވާ ވެބްސައިޓްތައްވެސް މި ހިދުމަތުގެ ތެރެއިން ބްލޮކް ކުރާނެ ކަމަށެވެ. އެހެންވެ މިހިދުމަތަކީ ބެލެނިވެރިންނަށް ދަރިންގެ ރައްކާތެރިކަން ކަށަވަރު ކުރެވި ހިތްހަމަޖެހުންތަކެއް ހޯދައިދޭނެ ހިދުމަތެއް ކަމަށް ދިރާގުން ދެކެ އެވެ.

ދިރާގު ނެޓް ޕްރޮޓެކް ކަސްޓަމައިޒް ކުރެވޭނީ ޕްރޮޓެކްޓް ޕޯޓަލްއިންނެވެ. މި ހިދުމަތް ދިރާގުން ފަށާފައި ވަނީ މޮބައިލް އިންޓަނެޓް އަދި ފިކްސްޑް ބްރޯޑްބޭންޑް ހިދުމަތަށެވެ. މި ހިދުމަތް އެކްޓިވޭޓްކޮށް ބޭނުން ކުރުމަށް މޮބައިލް ކަސްޓަމަރުން މަހަކު 35ރ. ދައްކަން ޖެހެ އެވެ. އަދި ފިކްސްޑް ބްރޯޑްބޭންޑް ކަސްޓަމަރުން މަހަކު 50ރ. ދައްކަން ޖެހެ އެވެ.

މި ހިދުމަތަކީ އެކައުންޓް މައުލޫމާތާއި އަމިއްލަ މައުލޫމާތުތައް ލީކުވުމާއި މުޖުތަމައުއާ ނުގުޅޭ އެކި މަންޒަރުތައް ހިމެނޭ ވެބްސައިޓުތައް ބްލޮކް ކުރުމަށް ބޭނުން ކުރެވޭނެ ހިދުމަތެކެވެ. ދިރާގުން މަސައްކަތް ކުރަމުން ދަނީ އެ ކުންފުނިން ދޭ ހިދުމަތްތަކަކީ ރައްކާތެރި ހިދުމަތްތަކަކަށް ހެދުމަށެވެ.