އަންހެނުންނަށް އަނިޔާކުރުމަކީ ފައިދާއެއް ނެތް ގެއްލުންހުރި ހަޑިހުތުރު އަމަލެއް

އިބްރާހިމް އާދަމް

04 އޮކްޓޫބަރ 2024 - 15:40

0 comments

އަންހެނުންނަށް އަނިޔާކުރުމަކީ ފައިދާއެއް ނެތް ގެއްލުންހުރި ހަޑިހުތުރު އަމަލެއް ކަމަށް ހުކުރު ހުތުބާގައި ބުނެފި އެވެ.

ގެވެށި އަނިޔާގެ ސަބަބުން މުޖުތަމައުގެ އިޖްތިމާއީ ފޭރާން ހަލާކުވެ، އެކުވެރިކަމާއި އެއްބާރުލުން ނެތިގެންދާނެ ކަމަށާއި މިކަމުގެ ސަބަބުން މުޖުތަމައުގެ އަފްރާދުންގެ މެދުގައި އަރައިރުންތައް އުފެދި، ހަރުކަށި އަމަލުތައް އިތުރުވެދާނެ ކަމަށް ޚުތުބާގައި ވިދާޅުވިއެވެ. އެހެންކަމުން ގެވެށި އަނިޔާގެ ހުރިހާ ބާވަތަކުން ދުރުހެލިވުމަށް ދީނީ އިލްމުވެރިން ވަނީ ގޮވާލާފަ އެވެ.

"މުސްލިމް އަންހެނުންނަކީ އިސްލާމީ މުޖުތަމައުގެ ބިނާގެ އެއް ބައި ކަމުގައިވާ އިރު، އަދި އެ ކަނބަލުން މުސްލިމް ފިރިހެނުންގެ އަނބީންނަށް، ނުވަތަ މައިންނަށް، ނުވަތަ އުހްތުންނަށް، ނުވަތަ ދަރިންނަށްވާ އިރު، އެ ކަނބަލުންނަށް އަނިޔާވެރިވުމުގެ ކުރީން، އެ ކަމާ މެދު ކޮންމެ މުސްލިމަކު ވިސްނާން ޖެހޭނެ އެވެ. އެ ކަނބަލުންގެ އަގުވައްޓައިލުމަށް ޓަކައި، އެ ކަނބަލުންގެ އަބުރާބެހުމާއި، އެ ކަނބަލުންނަށް ފުރައްސާރަކުރުމާއި، އެ ކަނބަލުންގެ ޢިއްފަތްތެރިކަމަށް އަރައިގަތުމާއި، އެ ކަނބަލުން ނާޖާއިޒު ގޮތުގައި ބޭނުންކުރުމަކީ އިސްލާމްދީން މަނާކުރާ ބޮޑެތި ފާފަތަކުގެ ތެރޭގައި، ހިމެނޭ ކަންކަމެވެ،"

ގެވެށި އަނިޔާގެ ރޯގާ އަހަރެމެންގެ ގޭތެރޭގައި ވަކިހިއްޕަމުން ދަނީ ބައްޕައާއި ދަރީންނާ ދެމެދުގައާއި މަންމައާއި ދަރީންނާ ނުވަތަ ފިރިމީހާއާއި އަނބިމީހާއާ އަދި އަނބިމީހާއާއި ފިރިމީހާއާ ދެމެދުގައި ބަދަލުކުރެވޭ ހަރުކަށި މުޢާމަލާތުތަކުގެ ސަބަބުން ކަމަށް ހުތުބާގައި ބުންޏެވެ.

ބައެއް ފިރިހެނުން ހަރުކަށި އިބާރާތުން މުޢާމަލާތުކުރަނީ އަޚްލާޤު ރަނގަޅު ޢިލްމުވެރި ބަޔަކަށް އެ މީހުންގެ ދަރީން ހެދުމަށްޓަކައި ކަމަށާއި ދަރީން ރަނގަޅަށް ބަލަހައްޓާ ކިޔަމަންތެރި އަތްނބަކު ގޭގައި ބޭންދުމުގައި ބޭނުމުގައި ކަމަށްވާއިރު، ފިރިހެނާގެ މި އަމަލުގެ ނަތީޖާއަކީ، އަނބިމީހާއާއި ދަރީންގެ ނުކިޔަމަންތެރިކަން އިތުރުވުން ކަމަށް ބުނެފައިވެ އެވެ.

"އަމާންކަންމަތީ އޮންނަންޖެހޭ ގޭތެރެ ނާމާންވުމެވެ. ހިތްހަމަޖެހުން އޮންނަން ޖެހޭ ގޭތެރެ ހިތްދަތިވުމެވެ،" ހުތުބާގައި ބުނެފައިވެ އެވެ.

ފިރިމީހާ އޭނާގެ އަނބިމީހާއަށް ކަމޭހިތުމަކީ، އޭނާގެ ފިރިހެންވަންތަ ކަމަށް ލިބޭ އުނިކަމެއް ނޫން ކަމަށާއި ހަގީގަތަށް ބަލާއިރު، ފިރިމީހާގެ ފިރިހެންވަންތަކަން އޮންނާނީ އަނބިމީހާއަށް އަޅައިލުމާއި އޯގާތެރިވުމާއި އޭނާގެ ރިވެތި އަޚުލާޤުގެ މަތީގައި ކަމަށް ވެސް ޚުތުބާގައި ވަނީ ބުނެފަ އެވެ.

"ފިރިމީހާ އޭނާގެ އަނބިމީހާއަށް ކަމޭހިތުމަކީ، އޭނާގެ ފިރިހެންވަންތަކަމަށް ލިބޭ އުނިކަމެއް ނޫނެވެ. އަދި އެއީ އޭނާއަށް ލިބޭ އިހާނެތިކަމެއް ވެސް ނޫނެވެ. ހަގީގަތަށް ބަލާ އިރު ފިރިމީހާގެ ފިރިހެންވަންތަކަން އޮންނާނީ އަނބިމީހާއަށް އަޅައިލުމާއި އޯގާތެރިވުމުގެ މަތީގައެވެ. އޭނާގެ ރިވެތި އަހްލާގުގެ މަތީގައެވެ،"

އަންހެނުންނަށް އަނިޔާކުރުމަކީ ފައިދާއެއް ނެތް ގެއްލުންހުރި ހަޑިހުތުރު އަމަލެއް ކަމަަށާ އޭނާގެ ހަލާލު އަނބިމީހާއަށް ޖިސްމާނީ ގޮތުންނާއި ޖިންސީ ގޮތުން ވިޔަސް އަނިޔާކުރުމަކީ އިސްލާމްދީން ހުއްދަކުރާ ކަމެއް ނޫން ކަމަަށް ވެސް ހުތުބާގައޮ ބުނެފައިވެ އެވެ.