ކ. ގުރައިދޫގައި ގަވައިދާ ހިލާފަށް އުޅުނު 39 ބިދޭސީން ބަންދަށް

އައިމިނަތު ޝިޔާޒާ

26 އޮކްޓޫބަރ 2024 - 21:39

0 comments

ކ. ގުރައިދޫގައި ގަވައިދާ ހިލާފަށް ވިޔަފާރިކޮށް މަސައްކަތް ކުރަމުންދިޔަ 39 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.

އިމިގްރޭޝަނުން ބުނީ މި ހާއްސަ އޮޕަރޭޝަންގައި 42 ތަނެއް ބަލައި ފާސްކޮށް، 106 ބިދޭސީން ޗެކްކޮށް، އަދި ވިސާ ފުރިހަމަ ނޫން 11 ބިދޭސީންނަށް އިމިގްރޭޝަނަށް ހާޒިރުވުމަށް ލިޔުންދީ، ގަވައިދާ ހިލާފް ބިދޭސީންނަށް ވަޒީފާ ދީގެން އުޅުނު ފަސް ދިވެއްސަކަށް ލިޔުމުން ނަސޭހަތް ދީފައިވާނެ ކަމަށް ވެސް އިމިގްރޭޝަނުން ބުނެ އެވެ.

މި އޮޕަރޭޝަންގައި ކޮންޓްރޯލާ އޮފް އިމިގްރޭޝާން ޝަމްއާން ވަހީދާއި ޑެޕިއުޓީ ކޮންޓްރޯލަ އަހުމަދު އަޝްފާން ވެސް އަމަލީގޮތުން ބައިވެރިވެ ވަޑައިގަތެވެ. އެ ދެ ބޭފުޅުންގެ އިތުރުން އިމިގްރޭޝަންގެ 20 އޮފިސަރަކާއި ފުލުހުންގެ ނުވަ އޮފިސަރަކާއި ގުރައިދޫ ކައުންސިލުން ވެސް ބައިވެރިވި އެވެ.

އިމިގްރޭޝަނުން ބުނި ގޮތުގައި މި އޮޕްރޭޝަންގެ މަގްސަދަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ އަވަސް ހައްލެއް ހޯދުމުގައި މިފަދަ އޮޕްރޭޝަންތައް އަތޮޅުތަކުގައި ފުޅާކޮށް، ގަވާއިދާ ހިލާފަށް އުޅޭ ބިދޭސީންގެ ސަބަބުން ރާއްޖެއަށް އިގްތިސާދީ އަދި އިޖްތިމައީ ގޮތުން ލިބޭ ގެއްލުން ކުޑަކޮށް، އެމީހުންނާ މެދު އިމިގްރޭޝަންގެ ގާނޫނުގެ ދަށުން ފިޔަވަޅު އެޅުމެވެ.

ހިފެހެއްޓި 39 ބިދޭސީންގެ ތެރޭގައި ހިމެނެނީ ބަނގްލަދޭޝް، ސްރީ ލަންކާ، ނޭޕާލް އަދި އިންޑިއާ މީހުންނެވެ. އަދި ނައިޖީރިއާގެ މީހަކު ވެސް ހިމެނެ އެެވެ.

މިދިޔަ އަންގާރަ ދުވަހު ޝަމްއާން ވިދާޅުވި ގޮތުގައި، މި ސަރުކާރުގެ އެއް އަހަރު ދުވަހުގެ އަމާޒަކީ ގަވައިދާ ޚިލާފަށް އުޅޭ 5000 ބިދޭސީން ފުރުވާލުމެވެ. އެ މަސައްކަތުގެ ދަށުން، މިދިޔަ ހޯމަ ދުވަހާ ހަމައަށް 4،361 ބިދޭސީއަކު ފުރުވާލައިފައިވާ ކަމަށް އޭނާ ވިދާޅުވި އެވެ.