އަންނަ އަހަރަށް ގާތްގަނޑަކަށް 64 ބިލިއަން ރުފިޔާގެ ބަޖެޓެއް

ހަސަން ހަލީމް

30 އޮކްޓޫބަރ 2024 - 12:38

0 comments

އަންނަ އަހަރުގެ ދައުލަތުގެ ބޭސްލައިން ބަޖެޓް 64 ބިލިއަން ރުފިޔާއަށް އަރާނެ ކަމަށް ފިނޭންސް މިނިސްޓްރީން ލަފާކޮށްފި އެވެ.

އަންނަ އަހަރަށް ލަފާކޮށް ހުށަހަޅާ ބަޖެޓުގެ މައުލޫމާތު ފިނޭންސުން ރަސްމީކޮށް މިހާތަނަށް އާއްމުކޮށްފައެއް ނުވެ އެވެ. އަންނަ އަހަރުގެ ބަޖެޓުގެ މައުލޫމާތު މާދަމާ ފިނޭންސް މިނިސްޓަރު މޫސާ ޒަމީރު ރައްޔިތުން މަޖިލީހަށް ހުށަހަޅުއްވާނެ އެވެ.

އެނގިފައިވާ ގޮތުގައި އަންނަ އަހަރުގެ ބަޖެޓު ސައިޒަކީ 64 ބިލިއަން ރުފިޔާ އެވެ.

ފިނޭންސް މިނިސްޓްރީން ލަފާކުރާ ގޮތުގައި އަންނަ އަހަރުގެ އޯވަރޯލް ޑެފިސިޓް ހުންނާނީ 5.4 ބިލިއަން ރުފިޔާ ގައެވެ. އަދި ސުކޫކާއި ބޮންޑު ވިއްކައިގެން ދައުލަތަށް ހޯދާ 4.6 ބިލިއަން ރުފިޔާއައި ބޭރު ލޯނުތަކުން ހޯދާ 3.2 ބިލިއަން ރުފިޔާ ހިމެނޭހެން އަންނަ އަހަރުގެ ބަޖެޓް ފައިނޭންސިންގެ ގޮތުގައި ދައުލަތަށް ޖުމްލަ 16 ބިލިއަން ރުފިޔާ ހޯދުމަށް ލަފާކޮށްފައިވެ އެވެ.

ފިސްކަލް ސްޓްރެޓެޖީ ރިޕޯޓުގައިވާ ގޮތުން ހަރަދުކުޑަ ކުރުމަށް ކުންފުނިތައް ރީފޯމުކުރުމަށާއި ޑައިރެކްޓް ސަބްސިޑީ ދިނުމަށާއި އޮފީސްތަކުގެ ހިިންގުމުގެ ހަރަދުތައް ކުޑަކުރުމަށް އިސްކަމެއް ދޭނެ އެވެ. ނަމަވެސް އެ ފިޔަވަޅުތައް ރަނގަޅަށް ތަންފީޒު ނުކުރެވިއްޖެނަމަ އަންނަ އަހަރުގެ ޖުމްލަ ހަަރަދު 57 ބިލިއަން ރުފިޔާއަށް އަރާނެ އެވެ.

މީގެއިތުރުން ރިކަރަންޓް ހަރަދު 42 ބިލިއަން ރުފިޔާއަށް އަދި ކެޕިޓަލް ހަރަދު 23 ބިލިއަން ރުފިޔާއަށް އަރާނެ ކަމަށްވެސް ލަފާކޮށްފައިވެ އެވެ.

ހަރަދުކުޑަ ކުރުމަށް އެޅުމަށް ނިންމާފައިވާ ފިޔަވަޅުތައް ފުރިހަމައަށް ތަންފީޒު ކުރެއްވިއްޖެނަމަ ބަޖެޓް 55 ބިލިއަނަށް ކުޑަ ކުރެވޭނެ ކަމަށް ފިސްކަލް ސްޓްރެޓެޖީ ރިޕޯޓުގައި ބުނެ އެވެ.

މިއަހަރަށް ފާސްކޮށްފައި ވަނީ 49.8 ބިލިއަން ރުފިޔާގެ ބަޖެޓެކެވެ. ނަމަވެސް މިދިޔަ ބުރާސަފަތި ދުވަހު ފިނޭންސް މިނިސްޓްރީން ވަނީ 5.1 ބިލިއަން ރުފިޔާގެ ސަޕްލިމެންޓްރީ ބަޖެޓެއް މަޖިލީހަށް ހުށަހަޅާފަ އެވެ.