ބަޖެޓުން ދައުލަތަށް އާމްދަނީ އިތުރުކުރެވޭނެ ގޮތުގެ ތަފްސީލް ސާފު: މުހައްމަދު

ހަސަން ހަލީމް

19 ނޮވެމްބަރ 2024 - 22:57

0 comments

މަޖިލީހުގެ ޖަލްސާއެއްގައި ވިލިމާލެ ދާއިރާގެ ޕީއެންސީ މެންބަރު މުހައްމަދު އިސްމާއީލް ވާހަކަ ދައްކަވަނީ

މިއަހަރަށް ކަނޑައެޅި ބަޖެޓުގައި ދައުލަތަށް އާމްދަނީ އިތުރުކުރެވޭނެ ގޮތްތަކާބެހޭ ތަފްސީލް ވަރަށް ސާފުވާނެހެން ހިމަނާފައި އެބަ އޮތް ކަމަށް ވިލިމާލޭ ދާއިރާގެ ޕީއެންސީ މެންބަރު މުހައްމަދު އިސްމާއިލް ވިދާޅުވެއްޖެ އެވެ.

އަންނަ އަހަރަށް ލަފާކޮށް ހުށަހަޅާފައިވާ ބަޖެޓު ބަހުސްގައި މުހައްމަދު ވިދާޅުވީ، މިއީ ތާރީހުގައި މަޖިލީހަށް ވެރިއަކު ހުށަހެޅި އެންމެ ފުރިހަމަ ބަޖެޓުކަމަށެވެ. އަދި ވިދާޅުވީ މިއީ ވަކި ރަށަކަށް، ވަކި ބަޔަކަށް ފައިދާއެއް ނުވަތަ މަންފާއެއް ލިބިދޭ ގޮތަށް އޮތް ބަޖެޓެއް ނޫންކަމަށެވެ. މުހައްމަދު ވިދާޅުވި ގޮތުގައި ތަހުޒީބު މުޖްތަމައުތަކުގައި ވެސް ބަޖެޓު ފަރުމާ ކުރެވިގެން އަންނަނީ، ވަކި ބަޔަކަށް ވަކި އުސޫލެއް އޮންނަ މޭރުމުން ނޫންކަމަށެވެ.

މުހައްމަދު އިތުރަށް ވިދާޅުވީ ވަކި ވަކި ރަށްރަށުގައި ހިންގާ މަޝްރޫއުތަކަށް ކަނޑައަޅާފައިވާ ފައިސާގެ އަދަދަކީ ކޮބައިކަން ބަޖެޓު ތަފްސީލުތައް ހިމެނޭ ޝީޓުގައި ޖަހާފައި ނެތުމުން ސަރުކާރާ އިދިކޮޅު މެންބަރުން ކަންބޮޑުވުން ފާޅުކުރަމުންދާ ކަމަށެވެ. ނަމަވެސް ތަފްސީލް ހިމަނައިގެން މީގެ ކުރިން ބަޖެޓު ހެދި ނަމަވެސް، ރައްޔިތުން ބޭނުންވި މިންވަރަށް މަޝްރޫޢުތައް ނިމުނުތައް ފެނިގެންގޮސްފައިނުވާކަން މެންބަރު ފާހަގަކުރެއްވި އެވެ.

މުހައްމަދު ވިދާޅުވީ ވަކި ވަކި ތަފްސީލް ނުހިމެނި ނަމަވެސް، މިއަހަރަށް ކަނޑައެޅި ބަޖެޓުގައި ދައުލަތަށް އާމްދަނީ އިތުރުކުރެވޭނެ ގޮތްތަކާބެހޭ ތަފްސީލް ވަރަށް ސާފުވާނެހެން ހިމަނާފައި އޮތް ކަމަށެވެ.

"އެއާޕޯޓް ޓެކްސް، ސިނގިރޭޓު ޑިޔުޓީ ބޮޑުކުރުމުން ލިބޭ އާމްދަނީ، ގްރީން ޓެކްސް، ބިން ހިއްކައިގެން ލިބޭ ވެލި ވިއްކައިގެން ލިބޭ އާމްދަނީ ތަފްސީލްކޮށް ބަޖެޓުގައި ހިމަނާފައި އެބައޮތް." ޕީއެންސީގެ ޕާލިމެންޓްރީ ގްރޫޕުގެ ޑެޕިއުޓީ ލީޑަރު މުހައްމަދު އިސްމާއިލް ވިދާޅުވި އެވެ.

މުހައްމަދު ވިދާޅުވީ އެމްޑީޕީގެ އެންމެ ފުރަތަމަ ވެސް އައި ވެރިކަމުގައި ފާސްކުރި ބަޖެޓުން ވެސް ރައްޔިތުންނަށްޓަކައި ހިންގި ޕީއެސްއައިޕީގެ މަޝްރޫއުއެއް ނުވަތަ ފެށި ޕްރޮޖެކްޓަކުން ވެސް ލިބުނު މަންފާއެއް ފެންނަން ނެތްކަމަށެވެ. އަދި ވިދާޅުވީ ބަޖެޓު ހުސްވެގެން ދިވެހި ދައުލަތުގެ އެސެޓު އޭރު ވިއްކާލިކަމަށެވެ. ކުންފުނިތަކުގެ ހިއްސާތަކާއި، އެއާޕޯޓު ވެސް ވިއްކާލައި މުޅި ދައުލަތް އެއްކޮށް އޭރު ހަލާކުގެ މަގަށް ވައްޓާލިތަން ދިވެހިރައްޔިތުންނަށް ފެންނާނެކަމަށް މުހައްމަދު ވިދާޅުވި އެވެ.

ފިނޭންސް މިނިސްޓްރީން އަންނަ އަހަރަށް ލަފާކޮށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ. މަޖިލީހަށް ބަޖެޓް ހުށަހަޅާފައިވަނީ މިދިޔަ މަހުގެ 31 ވަނަ ދުވަހު އެވެ.

ބަޖެޓްގެ ހަރަދު 49.2 ބިލިއަން ރުފިޔާއަށް އަރާނެ ކަމަށް ލަފާކޮށްފައިވާއިރު އޭގެ ތެރެއިން 35.9 ބިލިއަން ރުފިޔާއަކީ ރިކަރަންޓް ހަރަދެވެ. 13.3 ބިލިއަން ރުފިޔާއަކީ ކެޕިޓަލް ހަރަދެވެ.

ޓެކްސް އާމްދަނީގެ ގޮތުގައި އަންނަ އަހަރު 29.2 ބިލިއަން ރުފިޔާ ޓެކްސް ނޫން އާމްދަނީގެ ގޮތުގައި އަށް ބިލިއަން އަދި ހިލޭ އެހީގެ ގޮތުގައި އަންނަ އަހަރު 2.6 ބިލިއަން ރުފިޔާ ލިބޭނެ ކަމަށް ވަނީ އަންދާޒާކޮށްފަ އެވެ.