ތިންވަނަ ކުއާޓަރުގައި އުރީދޫގެ އާމްދަނީ 544 މިލިއަނަށް

ހަސަން ހަލީމް

03 ނޮވެމްބަރ 2024 - 14:22

0 comments

މި އަހަރުގެ ތިން ވަނަ ކުއާޓަރުގައި އުރީދޫ މޯލްޑިވްސް އަށް 544 މިލިއަން ރުފިޔާގެ އާމްދަނީއެއް ލިބިއްޖެ އެވެ.

އުރީދޫ މޯލްޑިވްސް އިން އާންމުކޮށްފައިވާ މިއަހަރުގެ ތިންވަނަ ކުއާޓަރުގެ މާލީ ހިސާބުތައް ދައްކާ ގޮތުންް މި އަހަރުގެ ދެވަނަ ކުއާޓަރާ އަޅާބަލާއިރު ތިން ވަނަ ކުއާޓަރުގައި އެ ކުންފުންޏަށް ލިބުނު އާމްދަނީ ވަނީ އިތުރުވެފަ އެވެ. އުރީދޫއަށް މި އަހަރުގެ ދެވަނަ ކުއާޓަރުގައި އާމްދަނީގެ ގޮތުގައި ލިބުނީ 540 މިލިއަން ރުފިޔާ އެވެ.

މާލީ ހިސާބުތައް ދައްކާ ގޮތުން އުރީދޫ މޯލްޑިވްސްއަށް މި އަހަރުގެ ތިންވަނަ ކުއާޓަރުގައި އެންމެ ބޮޑު އާމްދަނީއެއް ލިބުނީ މޯބައިލް ހިދުމަތްތަކުންނެވެ.

އެ ގޮތުން މޯބައިލް ހިދުމަތްތަކުން 411.2 މިލިއަން ރުފިޔާގެ އާމްދަނީއެއް އުރީދޫއަށް ލިބުނެވެ.

މީގެ އިތުރުން ފިކްސްޑް، ބްރޯޑްބޭންޑް އެންޑް އެންޓަޕްރައިސް ހިދުމަތްތަކުން 132.6 މިލިއަން ރުފިޔާގެ އާމްދަނީއެއް ލިބުނު އިރު، އެހެނިހެން ހިދުމަތްތަކުން 198،000ރ ރުފިޔާގެ ލިބިފައިވެ އެވެ.

އުރީދޫން ބުނީ ޓެކުހަށް ކެނޑުމަށް ފަހު މި އަހަރުގެ ތިންވަނަ ކުއާޓަރުގެ ސާފު ފައިދާ އަކީ 167 މިލިއަން ރުފިޔާ ކަމަށެވެ. ޓެކުހަށް ކެނޑުމުގެ ކުރިން އެ އަދަދު ހުރީ 195 މިލިއަން ރުފިޔާގަ އެވެ.