ޚަރަދު ނުދޭ ބައްޕައަކު ޖަލަށްލައި، ބޭންކު އެކައުންޓް ފްރީޒްކޮށް ޕާސްޕޯޓު ހިފަހައްޓައިފި

މަރިޔަމް އަނާ

07 ނޮވެމްބަރ 2024 - 18:15

0 comments

ދަރިފުޅަށް ހަރަދު ނުދޭ މައްސަލާގައި ކުއްޖާގެ ބައްޕަ އެއް މަސް ދުވަހަށް ޖަލަށްލައި، އޭނާގެ ޕާސްޕޯޓު ހިފަހައްޓައި، ބޭންކު އެކައުންޓު ފްރީޒްކޮށް، ތިން މަސް ދުވަހުގެ ތެރޭގައި ހުރިހާ ފައިސާއެއް ދެއްކުމަށް ގއ. ވިލިނގިލީ މެޖިސްޓްރޭޓް ކޯޓުން އިއްޔެ ހުކުމްކޮށްފި އެވެ.

ދަރިފުޅަށް ހަރަދު ދިނުމަށް ކޯޓު މެދުވެރިކޮށް ކަނޑައަޅާފައިވާ ގޮތަށް ގަވާއިދުން ހަރަދު ނުދީ، އެ ފައިސާ 100،000ރ.އަށް ވުރެ ގިނަވުމުން މަންމަ ވަނީ ވިލިނގިލި މެޖިސްޓްރޭޓް ކޯޓަށް މައްސަލަ ހުށަހަޅައިފަ އެވެ.

ތަފްސީލް - މެޖިސްޓްރޭޓް އާއިޝަތު ޝިހާބު ކުރެއްވި ހުކުމުން އެނގުނު ގޮތުގައި:

މިދިޔަ ސެޕްޓެމްބަރު މަހާ ހަމައަށް ދަރީގެ ހަރަދުގެ ގޮތުގައި ނުދައްކާވާ ފައިސާއަކީ 153،504ރ.
އެންމެ ފަހުން ފައިސާ ދެއްކީ، ކޯޓުން ހަރަދު ދިނުމަށް ހުކުމްކުރި މަހު 1،500ރ. ގަވާއިދު ބުނާ ގޮތުން މަހަކު 2،000ރ. ދައްކަން ޖެހޭ
ބައްޕަގެ ބޭންކު އެކައުންޓުގައި ހުރީ 960ރ.
ބައްޕަ ޖަލަށް ލައިގެން ވިޔަސް ހަރަދު ނަގައިދިނުމަށް ދަރިފުޅުގެ މަންމަ ކޯޓުގައި އެދިފައިވޭ
ލަފާ ކުރެވޭ ގޮތުގައި ހަރަދު ނުދޭތާ ގާތްގަނޑަކަށް ހަ އަހަރު ވަރުވެދާނެ. އެއީ 11 އަހަރުގެ ކުއްޖެއް

މި މައްސަލާގައި ކޯޓުން ހުކުމްކުރީ، ކުއްޖާގެ ބައްޕަ އެއް މަސް ދުވަހަށް ޖަލަށްލައި، ޕާސްޕޯޓު ހިފަހައްޓާށެވެ. އަދި އޭނާގެ އެކައުންޓު ފްރީޒްކޮށް އެކައުންޓުގައިވާ ފައިސާ ކުއްޖާގެ މަންމައާ ހަވާލުކޮށް، ނުދައްކާ ބާކީވާ ފައިސާ ތިން މަސްތެރޭ ދައްކަން ހުކުމްކުރިއެވެ.

ހަމައެއާއެކު އެ ހުކުމުގައި ކުއްޖާގެ ބައްޕަގެ މައުލޫމާތު އާއްމުކޮށް ޝާއިއުކުރަން ވެސް ހުކުމްކުރިއެވެ.

ދަރިފުޅަށް ހަރަދު ނުދީފިނަމަ އާއިލާ ބެހޭ ގަވާއިދުގެ ދަށުން އެ މީހާ ބަންދުކުރުމަށް ފަހު އެކައުންޓް ފްރީޒުކޮށްގެން އޭގައި ހުރި ފައިސާ ނެގޭނެ އެވެ.