މޯލްޑިވްސް އިކޮނޮމިކް ގޭޓްވޭ މަޝްރޫއު ހަ މަސް ތެރޭގައި ފެށޭނެ: ސައީދު

އައިމިނަތު ޝިޔާޒާ

10 ނޮވެމްބަރ 2024 - 14:59

0 comments

އިހަވަންދިއްޕޮޅުގައި ތަރައްގީ ކުރަން ހަމަޖެހިފައިވާ މޯލްޑިވްސް އިކޮނޮމިކް ގޭޓްވޭ މަޝްރޫއުގެ އަމަލީ މަސައްކަތް ކުރިއަށް އޮތް ހަ މަސް ދުވަހުގެތެރޭގައި ފެށޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ދައުލަތުގެ މިޑިއާ، ޕީއެސްއަމަށް މިނިސްޓަރު ވިދާޅުވީ ފްރޭމްވޯކް އެގްރިމެންޓުގައި ސޮއިކުރުމާ ގުޅިގެން ކުންފުނީގެ ފަރާތުން މަސައްކަތް ކުރިއަށް ގެންދާނެގޮތުގެ ތާވަލެއް އެކުލަވާލައި ތަފުސީލީ އެގްރިމެންޓެއްގައި ވެސް ކުރިއަށް އޮތް ހަ މަހުގެ ތެރޭގައި ސޮއިކުރެވޭނެ ކަމަށެވެ.

"ދެން އަމަލީ މަސައްކަތްތައް ފެށުމަށް އެ ކުންފުނީގެ ޓެކްނިކަލް ބޭފުޅުން އެތަނަށް އައުމާއި، އެކި ކަހަލަ ދިރާސާތައް ކުރުމާއި، މަސައްކަތްތައް ކުރިއަށް ގެންދިޔުމުގައި ގެންދަން ޖެހޭ ހުރިހާ އިންތިޒާމުތަކެއް ކުރިއަށް ގެންދާނެ." ސައީދު ވިދާޅުވި އެވެ.

އިހަވަންދިއްޕޮޅު މަޝްރޫއުގެ ފުރަތަމަ ފިޔަވަހީގައި 100 މިލިޔަން ޑޮލަރުގެ އިންވެސްޓްމަންޓެއް ސީއޭއައިގެ ފަރާތުން ހިންގާނެ އެވެ. އަދި މަޝްރޫޢަށް ފަންޑުކުރާނީވެސް އެ ކުންފުނިންނެވެ.

އެ ގޮތުން މަޝްރޫއުގެ އަމަލީ މަސައްކަތްތައް ފެށުމަށް އޭޝިއާ އިންވެސްޓްމަންޓްސްގެ ޓެކްނިކަލް މީހުން ރާއްޖެ އައިސް ދިރާސާތައް ކުރާނެ ކަމަށް މިނިސްޓަރު ސައީދު ވިދާޅުވި އެވެ.

ބައިނަލްއަގުވާމީ ޕޯޓު ފެސިލިޓީތަކާއި، ބޯޓު މަރާމާތުކުރުމުގެ ހިދުމަތާއި، ބަންކަރިން ޚިދުމަތާއި، ކުރޫޒް ޓޫރިޒަމެއް ތަރައްގީ ކުރުމާއި ޓޫރިޒަމާ ގުޅުންހުރި އިތުރު މަސައްކަތްތަކާއި ރިއަލް އެސްޓޭޓުގެ ވިޔަފާރި އާއި، އެކްސްޕޯޓް ޕްރޮސެސިން ޒޯނެއް ވެސް ތަރައްގީ ކުރަން ހަމަޖެހިފައިވެ އެވެ.

މިއަދު ބޭއްވި ރަސްމިއްޔާތުގައި ކެޕިޓަލް އޭޝިއާގެ ފަރާތުން ސޮއި ކުރެއްވީ އެ ކުންފުނީގެ ޗީފް ކޮމާޝަލް އޮފިސާ ޖޯޖް ޓަން އެވެ.

މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯންގެ ފަރާތުން އެއްބަސްވުމުގައި ސޮއި ކުރެއްވީ އެ ކުންފުނީގެ މައި ހިއްސާދާރު ކަމަށްވާ އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހީމް އެވެ.