ރާއްޖޭގެ އިގުތިސާދަށް ގެންނަންޖެހޭ މުހިއްމު ބޮޑެތި ބަދަލުތަކެއް ގެނެވިއްޖެ: ސައީދު

ހަސަން ހަލީމް

17 ނޮވެމްބަރ 2024 - 12:56

0 comments

ޑިވެލޮޕްމަންޓް ބޭންކް އިފްތިތާކުރުމަށް ރޭ ބޭއްވި ރަސްމިއްޔާތުގައި މިނިސްޓަރު ސައީދު ވާހަކަދައްކަވަނީ

މި ސަރުކާރަށް ފާއިތުވީ ކުރު މުއްދަތުގެ ތެރޭގައި ރާއްޖޭގެ އިގުތިސާދަށް ގެންނަންޖެހޭ މުހިއްމު ބޮޑެތި ބަދަލުތަކެއް ގެނެވިފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ސައީދު މިފަދައިން ވިދާޅުވީ ރޭ ޑިވެލޮޕްމެންޓު ބޭންކު ހުޅުވުމަށް ބޭއްވި ރަސްމިއްޔާތުގައި ދެއްކެވި ވާހަކަފުޅުގަ އެވެ. އޭނާ ފާހަގަކުރެއްވި ގޮތުގައި ކުރިއަށް އޮތް ތަނުގައި ރޭ ހުޅުވުނު ޑިވެލޮޕްމެންޓު ބޭންކަކީ ދިވެހިރާއްޖޭގެ ކުރިމަގުގެ ތަރައްގީ ބައްޓަންކުރާނެ، ވިލުންތެރިކަމުގެ ރަމްޒަކަށްވާނެ އެވެ.

ސައީދު ވިދާޅުވީ، ޑީބީއެމްއާއެކު އެ ބޭންކް ވާނީ ރާއްޖޭގެ އިގްތިސާދީ އަދި އިޖްތިމާއީ ދާއިރާއަށް މުހިއްމު ތަރައްގީތައް ގެނެސްދޭ ބޭންކަކަށް ކަމަށެވެ. އޭނާ ވިދާޅުވީ ރާއްޖެއަކީ ކުރީ ޒަމާނުއްސުރެ ވިޔަފާރީގެ ގައުމެއް ކަމަށާއި އަދި އެ ބޭންކާ އެކު ރާއްޖޭގެ އިގްތިސާދު ޑައިވާސިފައިކޮށް، ފުޅާ ކުރުމަށް ވަރަށް ބޮޑު އެހީތެރިކަމެއް ލިބޭނެ ކަމަށެވެ.

"ރާއްޖޭގައި ހިންގާ އުމްރާނީ ތަރައްގީގެ މަޝްރޫއުތަކާއި ވިޔަފާރިތަކަށް ފުޅާ ކުރުމަށް ބޭނުންވާ ފައިނޭންސިން އެ ބޭންކް މެދުވެރިކޮށް ހޯދޭނެ. އެއާ އެކު އިގްތިސާދު ދެމެހެއްޓެނިވި ކަމާ އެކު ފުޅާ ކުރަން ވަރަށް ބޮޑަށް ފަސޭހަވާނެ،" އޭނާ ވިދާޅުވި އެވެ.

ސައީދު އިތުރަށް ފާހަގަކުރެއްވީ މި ސަރުކާރަށް ފާއިތުވީ ކުރު މުއްދަތުގެ ތެރޭގައި ރާއްޖޭގެ އިގުތިސާދަށް ގެންނަންޖެހޭ މުހިއްމު ބޮޑެތި ބަދަލުތަކެއް ގެނެވިފައިވާ ކަމެވެ. އެ ކަންކަމަކީ ކުރީގެ ސަރުކާރުތަކުގައި މާކުރިން ކުރެވިފައި ހުންނަންޖެހޭ ކަންކަމަށްވީ ނަމަވެސް އެއިން އެއްވެސް ކަމެއް ނުކުރެވި އޮއްވައި އެކަންކަން ކުރެއްވީ ރައީސްކަން ސައީދު ފާހަގަކުރެއްވި އެވެ.

އެގޮތުން ބޭރު ފައިސާގެ ދަތިކަން ހައްލުކުރެއްވުމަށް އެޅުއްވި ފިޔަވަޅުތަކާއި، ސަބްސިޑީ ނިޒާމަށް ގެންނަވާ ބަދަލުތަކާއި އާމްދަނީއާއި ޚަރަދުގެ ދާއިރާތައް އިސްލާހު ކުރައްވަން ރައީސް އަޅުއްވަމުންދާ ފިޔަވަޅުތަކަކީ އިގުތިސާދުގެ އަސާސްތައް ރަނގަޅުކުރުމަށް މުހިއްމު ފިޔަވަޅުތަކެއްގެ ގޮތުގައި ސައީދު ފާހަގަކުރެއްވި އެވެ.

އޭގެ އިތުރަށް ފާއިތުވި ކުރު މުއްދަތުގައި އިގުތިސާދު ސިންދަފާތުކުރުމުގެ ގިނަ މަސައްކަތްތަކެއް ރައީސް ފައްޓަވާފައިވާކަން މިނިސްޓަރު ފާހަގަކުރެއްވި އެވެ. އަދި އަންނަ އަހަރު ޖީޑީޕީ 6.4 އިންސައްތައިން ކުރިއަރާނެ ކަމުގައި ބެލެވޭތީ އަންނަ އަހަރަކީ އިގުތިސާދީ ހަތަކާތްތަކުގެ އަހަރެއްގެ ގޮތުގައި ސައީދު ސިފަކުރެއްވި އެވެ.

އޭނާ ވިދާޅުވީ މާލީ ދާއިރާ ފުޅާކޮށް، ފަހި މާހައުލެއް ގާއިމް ކުރުމަށް ފައިނޭންޝަލް ސެންޓަރާ ގުޅޭ ގާނޫނެއް ކުރިއަށް އޮތް ދެތިން ހަފްތާ ތެރޭގައި މަޖިލީހަށް ފޮނުވާނެ ކަމަށެވެ. އަދި އިންޓަނޭޝަނަލް ފައިނޭންޝަލް ސެންޓަރަކަށް ހެދުމަށް ގަތަރު ފައިނޭންޝަލް ސެންޓަރާއި ދުބާއީ ފައިނޭންޝަލް ސެންޓަރާއި އަބޫދާބީ ގްލޯބަލް މާކެޓުގެ އެހީތެރިކަން ލިބޭ ކަމަށް ސައީދު ވިދާޅުވި އެވެ.

ރޭގެ ހަފްލާގައި ޑީބީއެމްގެ ސީއީއޯ ނޮއެލް ގްރެގާ ޕެޓަސަން ޖޯންސް ވިދާޅުވީ އެ ބޭންކްގެ އެހީގައި މަޝްރޫއުތައް ހިންގުމަށް ބޭނުންވާ މާލީ އެހީތެރިކަން ރާއްޖޭގެ ވިޔަފާރިވެރިންނަށް ލިބޭނެ ކަމަށެވެ. އަދި ރާއްޖޭގެ ހުރިހާ ހިސާބެއްގައި ހިންގާ މަޝްރޫއުތަކަށް ވެސް އެހީތެރިކަން ފޯރުކޮށްދޭނެ ކަމަށް އޭނާ ވިދާޅުވި އެވެ.

ނޮއެލް ގްރެގާ ވިދާޅުވީ ރާއްޖޭގެ އިގްތިސާދަކީ ބޭރުގެ އެކްސްޓާނަލް ޝޮކްތަކުގެ އަސަރު ވަރަށް ފަސޭހައިން ކުރާ ގައުމަކަށްވާ އިރު އިޔާދަކުރަނިވި ހަކަތައިގެ ދާއިރާ ފުޅާ ކުރުމާއި މަސްވެރިކަމުގެ ދާއިރާ އާއި ދަނޑުވެރިކަމުގެ ދާއިރާ އަދި ޑިޖިޓަލް އިގްތިސާދު ފުޅާ ކުރެވޭނެ ގޮތްތައް ހޯދަން މުހިއްމު ކަމަށެވެ.

އޭނާ ވިދާޅުވީ، ޑީބީއެމްގެ މައިގަނޑު މަގްސަދަކީ 2040 ވަނަ އަހަރު އަންނައިރު ރާއްޖޭގެ އިގްތިސާދު ފުޅާކޮށް، އެންމެ ތަރައްގީވެފައިވާ އިގްތިސާދަކަށް ހެދުމަށް އެހީތެރިވެ، ސަރުކާރުގެ އެ އަމާޒު ހާސިލުކުރުން ކަމަށެވެ.