ނަތަންޔާހޫ ހައްޔަރުކުރަން އައިސީސީން އަމުރު ނެރެފި

ހަސަން ހަލީމް

21 ނޮވެމްބަރ 2024 - 22:29

0 comments

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރު ކުރަން އިންޓަނޭޝަނަލް ކްރިމިނަލް ކޯޓް (އައިސީސީ) އިން އަމުރެއް ނެރެފި އެވެ.

އައިސީސީން ވަނީ ނަތަންޔާހޫގެ އިތުރަށް ކުރީގެ ދިފާއީ ވަޒީރު ޔޯއަވް ގަލަންޓް ހައްޔަރުކުރަން ވެސް އަމުރުނެރެފައެވެ.

އެ މީހުންގެ މައްޗަށް ކޮށްފައި ވަނީ މިދިޔަ އަހަރުގެ އޮކްޓޫބަރު ހަތް ވަނަ ދުވަހުން ފެށިގެން މި އަހަރުގެ މޭ މަހުގެ 20ގެ ނިޔަލަށް ހަނގުރާމައިގެ ޖަރީމާތައް ހިންގައިފައިވާ ކަމުގެ ތުހުމަތެވެ.

"ގަލަންޓާއި ނަތަންޔާހޫ ގަސްތުގައި އަދި އެނގިހުރެ ޣައްޒާގެ ރައްޔިތުންގެ ދިރިތިބުމަށް ކޮންމެހެން ބޭނުންވާ ތަކެތި، ކާނާއާއި ފެނާއި ބޭހާއި ސިއްހީ ސާމާނުގެ އިތުރުން ތެލާއި ކަރަންޓުން ވެސް މަހުރޫމްކުރި ކަމަށް ގަބޫލުކުރެވޭނެ އެކަށީގެންވާ ސަބަބުތައް އެބަހުރި،" އެ އަމުރުގައި ބުނެފައިވެއެވެ.

އައިސީސީ އަކީ ގަތުލުއާންމުތަކާއި އިންސާނިއްޔަތާ ހިލާފު ކުށްތަކާއި ހަނގުރާމައިގެ ކުށްތައް އަދި ގައުމުތަކަށް ފިޔަވަޅު ނޭޅޭ ނުވަތަ އަޅަން ބޭނުން ނުވާ މައްސަލަތައް ބަލާ ކޯޓެކެވެ. އައިސީސީގެ މެމްބަރު ގައުމުތަކުގެ ގޮތުގައި 124 ގައުމު އޮވެ އެވެ. މީގެ ތެރޭގައި ރަޝިޔާ، ޗައިނާ، އިޒްރޭލު، އިންޑިއާ އަދި އެމެރިކާއެއް ނުހިމެނެ އެވެ.

މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 44،000 އަށް ވުރެ މައްޗަށް އަރާފަ އެވެ. ފާއިތުވި 24 ގަޑިއިރު އެކަނި ވެސް ގާޒާ އިން ވަނީ 71 މީހަކު ޝަހީދުކޮށްލާފަ އެވެ.

ހަނގުރާމައިގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ވަނީ ގޮސްފަ އެވެ. އަދި ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.