ގަލޮޅު ސަހަރާ އިން ބައެއް މަހާނަތައް ނަގަނީ

އައިމިނަތު ޝިޔާޒާ

05 ޑިސެމްބަރ 2024 - 13:42

0 comments

ގަލޮޅު ސަހަރާގައި ކުރާ މަސައްކަތްތަކާ ގުޅިގެން، އެ ސަހަރާއިން ބައެއް މަހާނަ ގާތައް ނެގުމަށް، މާލެ ސިޓީ ކައުންސިލުން ނިންމައިފި އެވެ.

ގަލޮޅު ސަހަރާ މަރާމާތުކޮށް، ބަދަލުތައް ގެނައުމުގެ މަސައްކަތް ކުރަމުން އަންނަތާ މިހާރު ދުވަސްތަކެއް ވެއްޖެ އެވެ. އެއާ އެކު ޖަނާޒާގެ ކަންކަން މެދުކަނޑާލާފައި އޮތުމަށް ފަހު އެކަން ކުރަން ފެށީ މީގެ ދެ މަސް ކުރިންނެވެ.

ސިޓީ ކައުންސިލުން ބުނީ ކުރަމުން ގެންދާ މަސައްކަތްތަކާ ގުޅިގެން ނަގަން ބޭނުންވަނީ ސަހަރާގެ ހުޅަނގު އުތުރު ފަރާތު ސަރަޙައްދާއި އިރު ދެކުނު ފަރާތު ސަރަޙައްދުގައި ހުރި ޤަބުރު ކަށިތައް ކަމަށެވެ.

އެހެން ކަމުން އެންމެ ފުރަތަމަ ނަގަންޖެހޭނީ އެ ސަރަހައްދުގައި ހުރި މަހާނަ ގާތަކެވެ.

އެހެން ކަމުން، އެ ސަރަހައްދުގައި މަހާނަ ގާތައް ޖަހާފައިވާ ފަރާތްތަކުން އެ ގާތައް ނަގައިގެން ގެންދަން ބޭނުންވާ ނަމަ، މި މަހުގެ 15ވަނަ ދުވަހުގެ ކުރިން އެ ކަން ކުރުމަށް ސިޓީ ކައުންސިލުން ބުނެއެވެ.

އަދި މި މަހު 15ގެ ކުރިން އެ މަހާނަ ގާތައް ނުގެންދާނަމަ، ސިޓީ ކައުންސިލުން އެ ގާތައް ނަގައި ނައްތައިލާނެ ކަމަށް ވަނީ އިއުލާން ކޮށްފައެވެ.

ގަލޮޅު ސަހަރާ މަރާމާތު ކުރުމުގެ މަސައްކަތް ސިޓީ ކައުންސިލުން އަންނަނީ ކުރަމުންނެވެ.

މި މަހާނަ ގާތައް ނަގަނީ ސީދާ ކޮން މަސައްކަތެއް ކުރުމަށް ކަމަށް ސިޓީ ކައުންސިލުން އަދި ނުބުނެ އެވެ.