ބުޅާތަކަށް ސްޕްރޭ ކުރުމުން ކަންބޮޑުވުން ފާޅުކޮށްފި

މަރިޔަމް އަނާ

08 ޑިސެމްބަރ 2024 - 11:47

0 comments

މާލޭގެ މޭރީ ބްރައުންއާ ދިމާލު ޕާކިން ޒޯންގައި އުޅޭ ބުޅާތަކަށް ސްޕްރޭ ކޮށްފައިވާތީ ބުޅާތަކުގެ ހައްގުގައި މަސައްކަތްކުރާ ޖަމިއްޔާ -- ފެލީން ވެލްފެއާ އޯގަނައިޒޭޝަނުން ކަންބޮޑުވުން ފާޅުކޮށްފި އެވެ.

ފީލައިން ވެލްފެއާ އޯގަނައިޒޭޝަނުން ރޭ ފޭސްބުކްގައި ކުރި ޕޯސްޓެއްގައި ބުނީ، މެރީ ބްރައުން ކުރިމަތީގެ ޕާކިން ޒޯނުގައި އުޅޭ ބުޅާތައް ގަޔަށް ބަޔަކު ނޫ ކުލައިގެ ސްޕްރޭއެއް ޖަހާފައިވާ ކަމަށެވެ. އެ ސަރަހައްދުގައި އުޅޭ ބުޅާތަކަށް އެ ޖަމިއްޔާ އިން ގަވާއިދުން ކާންދީ، ބަލަހައްޓާ އަދި ބޭނުންވާ އެހެން ކަންކަން ވެސް ހަމަޖައްސައިދޭއިރު، މިއީ ވަރަށް ހިތާމަވެރި ކަމެއް ކަމަށް ބުންޏެވެ.

އެއީ، މާލޭގައި ވަރަށް ގިނައިން ބުޅާ އުޅޭ ސަރަހައްދެކެވެ. އެ ސަރަހައްދުގައި އުޅޭ ބުޅާތަކަށް ބަޔަކު ގަސްދުގައި ތަކުރާރުކޮށް އަނިޔާކުރަމުން ދާ ކަމަށް ފެލީން ޖަމިއްޔާ އިން ތުހުމަތުކުރެ އެވެ.

"މިއަދު އަޅުގަނޑުމެންނަށް ފެނުނީ ވަރަށް ގިނަ ބުޅާތަކުގެ ގަޔަށް ނޫ ކުލައިގެ ސްޕްރޭ ޖަހާފައި ހުއްޓާ، އެއީ އަނިޔާ ވެރި އަމަލެއް، އޭގައި [ސްޕްރޭ] ގައި ހުންނަ ކެމިކަލުން މި އެއްޗެހި ނުރައްކަލަށް ހުށަހެޅޭ،" އިނގިރޭސި ބަހުން ކުރި ޕޯސްޓުގައި އެ ޖަމިއްޔާ އިން ބުންޏެވެ.

ފެލީން ވެލްފެއާ އިން ބުނީ ބުޅާ ކަހަލަ ޖަނަވާރުތަކަށް އަނިޔާކުރުމުގެ ބަދަލުގައި ލޯތްބާއި އަޅާލުން ދޭން ޖެހޭ ކަމަށެވެ. ބުޅަލަށް އަނިޔާކުރާ ކަމަށް އެއްވެސް ފާރަތަކަށް އެނގިއްޖެނަމަ ރިޕޯޓް ކުރުމަށްވެސް އެދިފައިވެ އެވެ.

މާލޭގެ މަގުތަކުގައި ގިނަވެގެން އުޅޭ ބުޅާތަކަށް އަނިޔާކުރި މައްސަލަތައް މީގެކުރިންވެސް ފެންމަތިވެފައި އެބަހުއްޓެވެ.

މާލެ ސަރަހައްދުގައި ބުޅާ ގިނަވެ އާންމު އުނދަގުލަކަށް ވުމާ ގުޅިގެން ހުޅުމާލޭގައި މިހާރު ވަނީ އެފަދަ ބުޅާތައް ގެންގުޅެން ހާއްސަ ތަނެއް ހަދާފަ އެވެ. އޮޅުހިޔާގެ ނަމުގައި އެ ތަން ހުޅުވި ނަމަވެސް ބުޅާތައް އަދި އެތަނަށް ބަދަލުކުރަން ފަށާފައެއް ނުވެ އެވެ.

މާލެ ސަރަހައްދުގެ މަގުތަކުގައި ބުޅާ ގިނަވެ، އާންމުންނަށް އުނދަގޫވާން ފެށުމުން މާލޭ ސިޓީ ކައުންސިލާއި ސަރުކާރު ގުޅިގެން ވަނީ ހުޅުމާލޭގައި "އޮޅުހިޔާ"ގެ ނަމުގައި ބުޅާތަކަށް ހާއްސަ ފެސިލިޓީއެއް ހަދައިފަ އެވެ. އެ ފެސިލިޓީ ހުޅުވި ނަމަވެސް، މަގުމަތީގައި އުޅޭ ބުޅާތައް އެތަނަށް ގެންދަން އަދި ނުފަށަ އެވެ.