ހޮނިހިރުގައި ވެސް ޕާސްޕޯޓް ދޫކުރަނީ

މަރިޔަމް އަނާ

24 ޖެނުއަރީ 2025 - 18:31

0 comments

އަންނަ ހޮނިހިރު ދުވަހުން ފެށިގެން މާލެ ސަރަހައްދުގައި ޕާސްޕޯޓް ދޫކުރުމުގެ ޚިދުމަތް ހޮނިހިރުދުވަހުވެސް ލިބޭނެކަމަށް މޯލްޑިވްސް އިމިގްރޭޝަނުން ބުނެފި އެވެ.

އިމިގްރޭޝަނުން ބުނީ ހޮނިހިރު ދުވަހަކީ ރަސްމީ ބަންދު ދުވަހަކަށް ވިޔަސް މާދަމާ އިން ފެށިގެން މާލެ ސަރަހައްދުގައި ހިމެނޭ އިމިގްރޭޝަންގެ ތިން އޮފީހަކުން ކޮންމެ ހޮނިހިރު ދުވަހަކު ވެސް ޕާސްޕޯޓު ދޫކުރުމަށް ނިންމާފައިވާ ކަމަށެވެ.

"މީގެއިތުރުން، މެޑިކަލް އެމާޖެންސީގައި ރާއްޖެއިން ބޭރަށް ދާ ފަރާތްތަކަށް ކުރިއެކޭ ވެސް އެއްގޮތަށް 24 ގަޑިއިރު ހިދުމަތް ލިބިލައްވާނެ،" ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝައްމާން ވަހީދު މެސެޖުގައި ވިދާޅުވި އެވެ.

މާދަމާއިން ފެށިގެން ހޮނިހިރު ދުވަސްތަކުގައި ޕާސްޕޯޓު ދޫކުރުމުގެ ހިދުމަތް ދޭނީ މާލޭގައި ހުންނަ އިމިގްރޭޝަންގެ އޮފީހާއި ހުޅުމާލެ ދެ ފިޔަވަހީގައި ހުންނަ އެ ހިދުމަތުގެ ދެ އޮފީހުންނެވެ.

އިމިގްރޭޝަނުން އާންމުކުރި މައުލޫމާތުގައިވާ ގޮތުން ހޮނިހިރު ދުވަސްތަކުގައި ޕާސްޕޯޓު ދޫކުރުމަށް ނަމްބަރު ދޫކުރާނީ ހެދުނު 9:00 އިން މެންދުރު 12:00 އާ ހަމައަށެވެ.