މާރާމާރީ ހިންގި ބިދޭސީން ޑީޕޯޓްކޮށްލަނީ

މަރިޔަމް އަނާ

18 ޖެނުއަރީ 2025 - 20:28

0 comments

މާލޭ އާޓިފިޝަލް ބީޗުގައި ރޭ މާރާމާރީ ހިންގި މައްސަލައެއްގައި ހައްޔަރު ކުރި އިންޑިއާގެ ތިން މީހުން ޑީޕޯޓު ކުރުމަށް އިމިގްރޭޝަނުން ނިންމައިފި އެވެ.

އާޓިފިޝަލް ބީޗުގައި ރޭ ބިދޭސީންތަކެއްގެ މެދުގައި ހިނގި މާރާމާރީއާ ގުޅިގެން، ފުލުހުން ވަނީ ތިން މީހަކު ހައްޔަރުކޮށްފަ އެވެ. އެއީ އިންޑިއާ އަށް ނިސްބަތްވާ ތިން ފިރިހެނުން ކަމަށް ފުލުހުން ބުނެ އެވެ.

އެކްސްގައި ކުރެއްވި ޕޯސްޓެއްގައި ޝަމްއާން ވިދާޅުވީ އިއްޔެ އާޓިފިޝަލް ބީޗު ސަރަހައްދުގައި ބިދޭސީންތަކެއްގެ މެދުގައި ހިނގި މާރާމާރީއަކާއި ގުޅިގެން ފުލުހުން ތިން ބިދޭސީއަކު އިމިގްރޭޝަނާއި ހަވާލުކޮށްފައިވާ ކަމަށާއި މި އެންމެން ވެސް ޑީޕޯޓުކުރުމުގެ މަސައްކަތް ކުރަމުންދާ ކަމަށެވެ.

"އާންމު މަސްލަހަތަށް ނުރައްކާވާ ގޮތަށް މިފަދަ އަމަލުތައް ހިންގާ ބިދޭސީންނަށް އިތުރު ފުރުސަތެއް އަޅުގަނޑުމެން ނުދޭނަން،" ޝަމްއާން ވިދާޅުވި އެވެ.

މިދިޔަ މަހު ވެސް ބިދޭސީ ދެ ގްރޫޕެއްގެ ދެމެދުގައި މާރާމާރީ ހިންގާފައިވެ އެވެ. އެ މާރާމާރީ ވެސް ހިންގާފައި ވަނީ، އެ މީހުންނަށް ބަންދު ދުވަހެއްގެ ގޮތުގައި ލިބޭ ހުކުރު ދުވަހެއްގައި އާޓިފިޝަލް ބީޗަށް އެއްވެ ތިބި ވަގުތެއްގަ އެވެ.

ބިދޭސީންގެ ފަރާތުން ނޭދެވޭ އެތައް ކަމެއް ފެނި އެންމެ ފަހުން މާރާމާރީ ހިންގާ ހިސާބަށް ކަންކަން ގޮސް ތަކުރާރުކޮށް އެކަންކަން ހިނގަމުންދާއިރު ވެސް ފުލުހުން އެކަށީގެންވާ ފިޔަވަޅު ނާޅާ ކަމުގެ ޝަކުވާ ބޮޑެވެ.