ހަށިވިއްކުމުގެ ވިޔަފާރީގައި އުޅުނު ދެ ބިދޭސީއަކު އަތުލައިގެންފި

އިސްމާއިލް ރިޒާ

11 ފެބުރުއަރީ 2025 - 21:09

0 comments

ހަށިވިއްކުމުގެ ވިޔަފާރީގައި އުޅުނު ބިދޭސީ އަންހެނަކާއި އެޖެންޓެއްގެ ގޮތުގައި އުޅުނު ބިދޭސީ ފިރިހެނަކު އަތުލައިގަނެފި އެވެ.

އިމިގްރޭޝަނުން މިއަދު ބުނީ އެ ދެ މީހުން އަތުލައިގަތީ ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުންދާ ކަމަށް ތުހުމަތުކުރެވޭ ބިދޭސީން ހޯދުމަށް، އިމިގްރޭޝަނާއި ފުލުހުން ގުޅިގެން ހިންގި އޮޕަރޭޝަނެއްގައި ކަމަށެވެ.

މި މައްލައިގައި ހައްޔަރުކޮށްފައި ވަނީ އުމުރުން 39 އަހަރުގެ އިންޑިއާ އަންހެނަކާއި އުމުރުން 52 އަހަރުގެ ނޭޕާލް ފިރިހެނެކެވެ.

ރާއްޖޭގައި ގަވައިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރަން މި ސަރުކާރުން ވަނީ ޚާއްސަ އިސްކަމެއް ދީގެން މަސައްކަތްތަކެއް ފަށައިފައެވެ.

އެ މަސައްކަތުގެ ތެރެއިން އިމިގްރޭޝަނުން އަންނަނީ، މާލޭގައި ހިންގާ އޮޕަރޭޝަންގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ވެސް އޮޕަރޭޝަންތައް ހިންގަމުންނެވެ.