ޕީސީބީގެ ރައީސް ހަމްދީ މަގާމުން ވަކިކޮށްފި

މަރިޔަމް އަނާ

13 ފެބުރުއަރީ 2025 - 09:54

0 comments

ހަމްދީ އަގީލު. - ފޮޓޯ/އެޑިޝަން.އެމްވީ

ޕްރައިވެޓައިޒޭޝަން ކޯޕަރަޓައިޒޭޝަން ބޯޑު (ޕީސީބީ)ގެ ރައީސް ހަމްދީ އަގީލް މަގާމުން ވަކިކޮށްފި އެވެ.

ރައީސް މުހައްމަދު މުއިއްޒު އެ ނިންމެވުން ނިންމެވީ ކީއްވެ ކަމެއް އަދި ހާމައެއް ނުކުރެ އެވެ.

ހަމްދީ ޕީސީބީއަށް ވަޑައިގަތުމުގެ ކުރިން އޭނާ ވަނީ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާއި އެފްއެސްއެމްގެ މެނޭޖިން ޑިރެކްޓަރުކަން ކުރައްވާފަ އެވެ.

ހަމްދީ ވަނީ އޮސްޓްރޭލިއާގެ ކާޓިން ޔުނިވަސިޓީ އިން މާސްޓާ އޮފް ކޮމާސް ހާސިލު ކުރައްވައިފަ އެވެ.

ޕީސީބީގެ މެންބަރުން އައްޔަންކޮށް، ވަކިކުރައްވަނީ ވެސް ރައީސުލްޖުމްހޫރިއްޔާ އެވެ.

ޕީސީބީގެ ރައީސް ވަކިކޮށްފައިވަނީ، ސަރުކާރުގެ ކުންފުނިތަކުގައި ހަރަދު ކުޑަކުރުމަށާއި ރޯދަމަހުގެ އިނާޔަތް ފިޔަވައި އިތުރު އިނާޔާތްތައް ނުދިނުމަށް އަންގައި، އިއްޔެ ސާކިއުލާއެއް ނެރެފައި ވަނިކޮށެވެ.

ޕީސީބީ އަކީ ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި ކޯޕަރަޓައިޒް ކުރުމާއި މޮނިޓަކޮށް، އިވެލުއޭޓް ކުރުމުގެ ގާނޫނުގެ ދަށުން އުފައްދާފައިވާ ބޯޑެކެވެ. އެ ބޯޑުގެ ރައީސަކަށް ހަމްދީ އައްޔަންކުރައްވަން ރައީސް މުއިއްޒު ނިންމެވީ މި ވެރިކަމުގެ ފުރަތަމަ ހަފުތާގެ ތެރޭގަ އެވެ.