އެމްއައިބީގެ ކުޑަކުދިންގެ އެކައުންޓު ކަސްޓަމަރުންނަށް ހާއްސަ މާހެފުމެއް

މަރިޔަމް އަނާ

16 ފެބުރުއަރީ 2025 - 18:23

0 comments

އެމްއައިބީ ހެޑް އޮފީސް:

މޯލްޑިވްސް އިސްލާމިކް ބޭންކް (އެމްއައިބީ) ގައި ކުޑަކުދިންނަށް ހާއްސަ އެކައުންޓު ހުޅުވާފައިވާ ކަސްޓަމަރުންނަށް ހާއްސަ މާހެފުމެއް ބާއްވަން އެ ބޭންކުން ނިންމައިފި އެވެ.

އެމްއައިބީން ބުނީ، މި މަހުގެ 21ވަނަ ދުވަހު މި މާހެފުން އޮންނާނީ މާލެ އާޓިފިޝަލް ބީޗް ސަރަހައްދުގައި ހަވީރު 4:00އިން 6:00އަށް އަދި 8:00އިން 10އަށް ކަމަށެވެ.

މި މާހެފުމުގައި އެކައުންޓު ގެންގުޅޭ ކަސްޓަމަރުން ނޫނަސް ހުރިހާ ކުޑަކުދިންނަށް ބައިވެރިވެވޭއިރު، މި މާހެފުމުގެ ހަރަކާތުގައި ޚާއްސަ އިތުރު ހަރަކާތްތައް ވަނީ ހިމެނިފައެވެ. އެގޮތުން، ޑރ. އިބްރާހިމް ޒަކަރިއްޔާ މޫސާގެ ހާއްސަ "އާސްކް ޑރ. ޒެކް" އިވެންޓުގައި ކުދިންނަށް ދީނީ އެކި މައުލޫމާތު ދިނުމަށް ހަމަޖެހިފައިވާ ކަމަށް އެބޭންކުން ވަނީ ބުނެފަ އެވެ.

އެއެމްއައީބީގެ "ބިންގާ" އެކައުންޓަކީ އެބޭންކުން ކުޑަ ކުދިންނަށް ފަހަށް ރައްކާކުރުމަށް އިޖާދީ ބަދަލެއް ގެނެސް ތައާރަފުކުރި އެކައުންޓެކެވެ. މި އެކައުންޓުގައި ކޮންމެ ކުއްޖަކަށް ވެސް ތިން އެކައުންޓު ލިބޭއިރު، އެއީ ބިންގާ ޓްރާންސެކްޝަން އެކައުންޓަކާއި ބިންގާ ސޭވިން އެކައުންޓަކާއި ބިންގާ އިންވެސްޓް އެކައުންޓެކެވެ.

"ބިންގާ ޓްރާންސެކްޝަން" އެކައުންޓަކީ މާލީ ގޮތުން ޒިންމާދާރު ޒަމާނީ ވަސީލަތްތަށް ބޭނުންކުރުމަށް އާދަވެފައިވާ ކުދިބަޔަކަށް ހަދައިދޭނެ އެކައުންޓެކެވެ. ކުދިންގެ އުމުރުން ހަތް އަހަރު ފުރުމުން ކޭޝް ކާޑަކާއި އިންޓަނެޓް ބޭންކިން އަށް "ބިންގާ ޓްރާންސެކްޝަން" މެދުވެރިކޮށް އެކްސެސް ލިބޭނެ އެވެ.

"ބިންގާ ސޭވިން" އެކައުންޓަކީ ފަހަށް ފައިސާ ރައްކާ ކުރުމުގެ އާދަ އަށަގަންނުވަން ވަރަށް އެކަށޭނެ އެކައުންޓެއް ކަމަށް އެމްއައިބީ އިން ބުންޏެވެ. އެއީ ކުރުމުއްދަތަކަށް ފައިސާ ރައްކާ ކުރުމަށް ހާއްސަ އެކައުންޓެކެވެ.

އެމްއައިބީ އިން ބުނިގޮތުގައި، "ބިންގާ އިންވެސްޓްމަންޓް" އެކައުންޓަކީ ދިގު މުއްދަތަކަށް ފައިސާ ރައްކާކުރުމަށް ހާއްސަ އެކައުންޓެކެވެ. ކުއްޖާގެ އުމުރުން 18 އަހަރު ފުރުމުން އިތުރަށް ކިޔެވުމަށް ނުވަތަ އެޕާޓްމަންޓެއްގެ ޑައުން ޕޭމަންޓް ދެއްކުން ފަދަ ކަންކަމަށް ފައިސާ ރައްކާކުރުމަށް މި އެކައުންޓް ބޭނުންކުރެވިދާނެ އެވެ.

މި އީޖާދީ ބަދަލާއިއެކު ކުދިން މާލީ ގޮތުން ޒިންމާދާރު ބަޔަކަށް ހެދުމަށް އިތުރު ބާރަކަށް ވާނެ ކަމަށް އެމްއައިބީން ބުނެއެވެ.