ހަތަރު ރަށެއްގައި އެކްސްރޭގެ ހިދުމަތް ފަށަނީ، ލިސްޓުގައި ހޯރަފުށި ނެތް..!

އަހުމަދު ނިހާން

20 މާޗް 2025 - 13:20

1 comments

ހަތަރު ރަށެއްގައި މުޅިން އަލަށް އެކްސްރޭ ހިދުމަތް ފަށަން ހެލްތް މިނިސްޓްރީން ނިންމައިފި އެވެ.

އެކްސްރޭގެ ހިދުމަތް ފެށުމަށް ނިންމާފައިވަނީ ނ. ހޮޅުދޫ އާއި އެއަތޮޅު ވެލިދޫގެ އިތުރުން ށ. މިލަންދޫ، އަދި އދ. މާމިގިލީގަ އެވެ.

މި ރަށްތަކުގައި ހިދުމަތް ފެށުމަށް ނިންމާފައިވާއިރު، އިދާރީ އެންމެހާ މަސައްކަތް ނިންމާ، އަންނަ މަހު އަމަލީ މަސައްކަތް ފެށުމަށް ތައްޔާރުވަމުންދާ ކަމަށް ހެލްތް މިނިސްޓްރީން ބުންނެވެ. އެގޮތުން ހިދުމަތް ދިނުމަށްޓަކައި އިމާރާތަށް ގެންނަންޖެހޭ ބަދަލުތަކާއި، މެޝިން އިންސްޓޯލް ކުރުން ފަދަ ކަންތައްތައް ކުރުން ހިމެނެ އެވެ.

އަތޮޅު ހޮސްޕިޓަލްތަކާއި ރީޖަނަލް ހޮސްޕިޓަލްތައް އަދި ސިއްހީ މަރުކަޒުތައް ތަރައްގީކޮށް މާލެއަށް ބޭސްފަރުވާ ހޯދަން ދަތުރުކުރަންޖެހުން މަދުކުރުމަކީ ސަރުކާރުގެ ތަސައްވުރެކެވެ.

މިފަހުން ރައީސް ޑރ. މުއިއްޒު ހޯރަފުއްޓަށް ކުރެއްވި ދަތުރުފުޅުގައި އެމަނިކުފާނު ވަނީ މި ސަރުކާރުގެ ފަސް އަހަރު ނިމިގެންދާއިރު ހޯރަފުށީގެ ސިއްހީ ހިދުމަތް ރަނގަޅުކުރުމަށް މަސައްކަތެއް ކުރައްވާނެ ކަމަށް ވައުދުވެވަޑައިގެންފަ އެވެ.

ނަމަވެސް އެކަމުގެ އަމަލީ މަސައްކަތް ނުފެށި ހޯރަފުށީގެ ސިއްހީ ހިދުމަތް އެއް ދުވަހުން އަނެއް ދުވަހަށް ދަށް ވަމުން އަންނާތީވެ އެކަމުގެ ކަންބޮޑުވުން އެރަށުގެ ރައްޔިތުން އަންނަނީ ފާޅުކުރަމުން ނެވެ.

އިތުރަށް ކިޔާލަން: ހޯރަފުށީ ރައްޔިތުން އެންމެ ބޭނުންވެ ރައީސުލްޖުމްހޫރިއްޔާގެ އަރިހުން އެދުނު ހިދުމަތްތަކަކީ ކޮބާ..؟

ހޯރަފުށީގެ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގެ ތެރެއިން ރައީސް ވަނީ އެ މަނިކުފާނު ރައްޔިތުންނަށް ވެވަޑައިގަތް ކޮންމެ ވައުދެއް ވެސް ފުއްދަވާނެ ކަމުގެ ޔަގީންކަން ދެއްވާފަ އެވެ.