ރަށު މަޖިލިސް މެންބަރާމެދު ތިޔަ ކުރަނީ ކޮން އުންމީދެއް ހެއްޔެވެ.؟

އަހުމަދު ނިހާން

05 އޭޕްރީލް 2025 - 09:39

0 comments

ރައްޔިތުންގެ މަޖިލީހަށް "ރައްޔިތުން" މެންބަރުންތަކެއް އިންތިހާބުކުރަނީ ހުވަފެންތަކެއް ދެކިގެންނެވެ. ކޮންމެ ފަސް އަހަރަކުން ބަދަލުވަމުންދާ ވެރިކަމާއިއެކު ބައެއް ކަންކަން ބަދަލުކުރަން ބޭނުންވެފައި ތިބި މިންވަރު ނިމުނު މަޖިލިސް އިންތިހާބުތަކުން ސާފުވެ އެވެ. ނިމުނު 19 ވަނަ މަޖިލީސް އޮތީ ހިތަކަށް އެމްޑީޕީއަށެވެ. އެގޮތް ކަމުނުގޮސްގެން، އާ ވެރިޔަކާއިއެކު މިހާރު ޕީއެންސީއަށް ރައްޔިތުން ދިނީ "މާބޮޑު" މެޖޯރިޓީއެކެވެ.

ރައްޔިތުންނާއި ގާތުން ރައްޔިތުންނާ އަޑު އަހައިގެން ހުރިހާ ރައްޔިތުންގެ މަސްލަހަތުގައި މަސައްކަތް ކުރައްވަން ވައުދުވާ މެންބަރުން އިންތިހާބު ވުމަށްފަހު، މަޖިލީހަކީ ކޮންމެ މެންބަރަކު ވެސް އެ މީހެއްގެ ސިޔާސީ ބާރުވެރިކަމާއި އަމިއްލަ ޒާތީ ތައައްސަބަކަށްޓަކައި ވަންނަ ތަނަކަށް ހަދައިފި ކަމަށް ގިނަ އާންމުން ދެކެއެވެ. އެ މަޖިލީހުގެ ހަގީގީ ޒިންމާއާ ދުރުވެއްޖެ ކަމަށް ދިވެހީން ގަބޫލުކޮށްފި އެވެ.

މަޖިލީހުން ކަންކަން ނިންމަން ޖެހެނީ އާންމުންގެ ވިސްނުމާ އެއްގޮތަށެވެ. ކޮންމެ ރައްޔިތަކު ތަމުސީލުވާނެކަން ޔަގީންކުރަން އެ މަޖިލީހަށް 93 މެންބަރުން ހޮވައިގެން، އެއިން ކޮންމެ ބޭފުޅަކަށް މަހެއްގެ މައްޗަށް 82،500 ރުފިޔާ ހަރަދުކުރަނީ ވަރަށް މުހިންމު ޒިންމާއެއް މަތިކޮށްފައި އޮތީމަ އެވެ. އެކަމަކު، މިހާރު ބައެއް މެންބަރުންގެ އަމަލުތައް ހުންނަ ގޮތުން އެ ބޭނުން ކެނޑިއްޖެ އެވެ.

މައިގަނޑު ހަތް ޒިންމާއެއް ގާނޫނުއަސާސީން މަޖިލީހުގެ މައްޗަށް މަތިކުރެ އެވެ. އެއީ:

ޤާނޫނުއަސާސީގައި ބަޔާންކުރާ ގޮތުގެމަތީން ގާނޫނުއަސާސީއަށް އިސްލާހު ގެނައުން.
ބޭނުންވެއްޖެ ކޮންމެ ކަމަކާ ބެހޭގޮތުން، އިސްލާމްދީނުގެ އަސްލަކާ ހިލާފުނުވާ ގޮތުގެމަތީން ގާނޫނު ހެދުމާއި، ގާނޫނަށް ބަދަލު ގެނައުމާއި، ގާނޫނު ބާތިލުކުރުން.
ވެރިކަން ހިންގުމުގެ ބާރުގެ ފަރާތުން ކުރާ ކަންތައްތައް ހިނގާނުހިނގާ ގޮތް ބެލުމާއި ވެރިކަން ހިންގުމުގެ ބާރު ޖަވާބުދާރީކުރުވުން. އަދި، މި ކަންކަން ކުރުމަށްޓަކައި ގާނޫނުއަސާސީއާއި ގާނޫނުގައިވާ ގޮތުގެމަތީން ފިޔަވަޅުތައް އެޅުން.
ދައުލަތުގެ އަހަރީ ބަޖެޓާއި ސަޕްލިމެންޓަރީ ބަޖެޓު ފާސްކުރުން.
މުސްތަގިއްލު ކޮމިޝަންތަކާއި މުސްތަގިއްލު މަގާމުތަކާ ބެހޭގޮތުން ނިންމާންޖެހޭ ކަންތައްތައް ގާނޫނުގައިވާ ގޮތުގެމަތީން ނިންމުން.
ރައްޔިތުންނާ ގުޅޭ މުހިންމު ކަންތައްތަކުގައި ރައްޔިތުންގެ ހިޔާލު ހޯދުމުގެ އާންމު ވޯޓު ނެގުން.
ރައްޔިތުންގެ މަޖިލީހުން އަދާކުރާން ޖެހޭނެކަމަށް ގާނޫނުއަސާސީގައި ނުވަތަ ގާނޫނުގައި ބަޔާންކޮށްފައިވާ މި ނޫން ވެސް ވާޖިބުތައް އަދާކުރުން.

އެއަށް ފަހުގައި ގާނޫނުއަސާސީގެ 75 ވަނަ މާއްދާގައި މެންބަރުން މަސައްކަތް ކުރަންވީ ގޮތް ވެސް އޮތީ ބަޔާންކޮށްފަ އެވެ. އެ މީހުންގެ އަމަލުތަކާއި ބަސްތަކާއި ވިސްނުން ބައްޓަންކުރަންވީ ކިހިނެއްކަން ވެސް ގާނޫނުއަސާސީގައި އެބައޮތެވެ.

އެ މާއްދާގައި ބުނަނީ:

"ރައްޔިތުންގެ މަޖިލީހުގެ މެންބަރުން އަމަލުކުރާންވާނީ، ގައުމީ މަސްލަހަތާއި ރައްޔިތުންގެ ލާބަޔާއި މަންފާއަށް އިސްކަންދީގެންނެވެ. އަދި، އެއްވެސް މެންބަރަކު އެ މީހެއްގެ ނުވަތަ އެ މީހަކާ ހާއްސަ ގުޅުމެއް އޮތް އެހެން މީހެއްގެ ވެސް ޒާތީ މަސްލަހަތެއް ކުރިއެރުވުމަށް މަގާމުގެ ބޭނުންކޮށްގެނެއް ނުވާނެ އެވެ. އަދި، އެބައިމީހުން، އެބައިމީހުން އިންތިހާބުވީ ދާއިރާތައް ތަމުސީލުކުރުމުގައި، މުޅި ގައުމާއި ހުރިހައި ރައްޔިތުންގެ ލާބަޔާއި މަންފާއަށް ރިއާޔަތްކުރާންވާނެ އެވެ."

ގާނޫނުގައި މި ވާހަކަތައް މިހެން ހުރި ނަމަވެސް މަޖިލީސް އިންތިހާބުތަކުގެ ކެންޕެއިން ރެލީތަކުގައި މި އަޑުތަކެއް ނުއިވެ އެވެ. އަބަދުވެސް އިވެނީ ރައްޔިތުންގެ އަޑު އަހާނެ ވާހަކަ އެވެ. ސަރުކާރާއި ގުޅިގެން ތަރައްގީ ގެނެސްދޭނެ ވާހަކަ އެވެ. ފޯނުނަގާނެ ވާހަކަ އެވެ. ވޮލީ މުބާރާތާއި ފުޓްސަލް މުބާރާތް ބާއްވަދޭނެ ވާހަކަ އެވެ. މި ދެންނެވި ސަބަބުތައް މިހެން ހުރުމުން ގިނަ ރައްޔިތުން މިހާރު ގަބޫލު ކުރަނީ މަޖިލީހަށް ފޮނުވާ މީހާ އަކީ ރައްޔިތުންގެ ތަރައްގީގެ "މެދުވެރިޔާ" ކަމަށެވެ. އަދި ގިނަ މީހުންގެ ވިސްނުންވެސް ހުންނަނީ އެ ދާއިރާއެއްގެ މަޖިލިސް މެންބަރަކީ ރައްޔިތުންނަށް ދަތިވާ ކޮންމެ ކަމެއް ކޮށްދޭން ހުންނަ މީހެއް ކަމަށެވެ. އެހެންކަމުން މީހަކު ބަލިވިޔަސް، ދަރަނިވެރި ވިޔަސް، ކުލި ނުދެއްކުނަސް، އަދި ވަޒީފާއެއް ހޯދަން ވިޔަސް އެންމެ ފުރަތަމަ ގުޅާނީ މެންބަރަކަށެވެ.

ވާނީ ވެސް އެހެންތާ އެވެ. އިންތިހާބަށް ރަށަށް ގޮސް ވާ ވައުދުތަކުގައި ހުންނަނީ މިފަދަ ރާގެވެ. ނަމަވެސް އިންތިހާބު ވުމަށްފަހު މަޖިލީހުގައި އިންނަވާ މެންބަރުގެ ހިތުގައި ރައްޔިތުންގެ ވިންދެން ނުޖަހަ އެވެ. އެ ތަނުގައި ހިނގަނީ ސިޔާސީ ޕާޓީތަކުގެ ފިކުރާއި ހިޔާލެވެ. ތަމުސީލު ވަނީ ވެސް ޕާޓީތަކެވެ. ރައްޔިތުންގެ އިހުސާސްތަކެއް ނޫނެވެ. މަޖިލީހުގައި ތިބެންވާނީ ސަރުކާރުން ބުނާހާ ކަމަކަށް އެއްބަސްވާނެ ބޮޓުންނެއް ނޫނެވެ. ހެވާއި ނުބައި ވަކި ކޮށްދޭނެ ގާބިލު, ތަޖުރިބާއާއި އިލްމު ހުރި މީހުންނެވެ.

ދިރާސާތަކުން ވެސް ދައްކަނީ ދިވެހިންގެ ތެރޭގައި މަޖިލީހަށް އިތުބާރެއް ނެތް ކަމަށެވެ. ޓްރާންސްޕޭރެންސީ މޯލްޑިވްސް އިން 2016 ވަނަ އަހަރު ހެދި ދިރާސާއަކުން ދައްކާ ގޮތުން ދިވެހިން ގަބޫލްކުރާގޮތުގައި ރާއްޖޭގައި އެންމެ ކޮރަޕްޓް އިދާރާއަކީ ރައްޔިތުންގެ މަޖިލީހެވެ. އެ ޖަމިއްޔާއިން ހާމަ ކުރާގޮތުގައި ތިންބާރުގެ ތެރެއިން ރައްޔިތުންގެ އެންމެ އިތުބާރު ކުޑަ ތަނަކީ ރާއްޖޭގެ ގާނޫނު ހަދާ މަޖިލީހެވެ.

މަޖިލިސް މެންބަރުގެ ކަންކަން ބަލާއިރު މިގޮތަށް ތުހުމަތު ކުރެވޭނެ ސަބަބުތައް ވެސް އެބަހުއްޓެވެ. ހޮވުނުއިރު މާބޮޑު ތަނަވަސް ކަމެއް ނެތް ބައެއް މެންބަރުން ދައުރެއް ހަމަކޮށްލާއިރު ނުހައްގު މުއްސަނދިކަން ހޯދާކަމަށް އެތައް ތުހުމަތެއް ކުރެއެވެ. އޭގެ ތެރޭގައި މާލޭގެ އަގު ބޮޑު ބިންތައް ގަތުމާއި ބޮޑެތި ވިޔަފާރިތައް ފެށުމާއި އެހެނިހެން ބޮޑެތި ހަރަދުތައް ކުރާކަމަށް ތުހުމަތު ކުރެވެ އެވެ.

ރައްޔިތުންގެ މަޖިލީހަކީ އޭގެ ޒާތުގައި ދިވެހިންގެ ކަންކަން ދިވެހިންގެ މަޝްވަރާގެ މަތީން ކުރުމުގެ ބޭނުމުގައި ދިވެހިން އެބައިމީހުންގެ ގާނޫނު އަސާސީން އުފައްދާފައި އޮތް ތަނެކެވެ. އެސިފަ އޭގެ ޒާތުން ނެތް މީހަކީ އެތަނުގެ މަސްއޫލިއްޔަތު އުފުލުމަށް ކުފޫ ހަމަވާނެ މީހެއް ނޫނެވެ. އަދި އެސިފަ އަމުދުން ނެތިފައި, ތިމާގެ އެންމެ ގާތުގައި ހުންނަ މީހާއަށް އޮޅުވާލައި އުޅޭ މީހުން އެއީ އެތަނާ ކައިރި ކުރުން އެއްވެސް ގޮތަކަށް ހެޔޮވާނޭ ބާވަތަކުގެ ބައެއް ނޫނެވެ.

ތިޔަ ރަށު މަޖިލިސް މެންބަރާމެދު ތިޔަ ކުރަނީ ކޮން އުންމީދެއް ހެއްޔެވެ؟ އޭނާއާއި އެންމެ އިސްކޮށް މަސައްކަތްކުރާ އެންމެ ގާތް މީހާގެ މައްޗަށް ވެސް ދައްކަނީ ކިބުރުވެރިކަމުގެ ގޮތްހެއްޔެވެ؟ އޭނާ މަވަންތަކަމާއި ބޮޑާކަމުގެ އިންތިހާ ހެއްޔެވެ.؟ ފެނިގެން ދަނީ ކޮން މަންޒަރެއްތޯ؟