އާރުޓީއެލް ފެރީގެ ހިދުމަތް ފުޅާކުރަން އިންޑިއާއިން 100 މިލިއަން ރުފިޔާގެ ހިލޭ އެހީ ދީފި

އަލީ ރާޒީ

18 މެއި 2025 - 22:31

0 comments

އާރުޓީއެލް ފެރީގެ ހިދުމަތް ފުޅާކުރަން އިންޑިއާއިން 100 މިލިއަން ރުފިޔާގެ ހިލޭ އެހީ ދިނުމުގެ އެއްބަސްވުމުގައި މިއަދު ސޮއިކޮށްފި އެވެ.

ފޮރިން މިނިސްޓްރީގައި ބޭއްވި ރަސްމިއްޔާތުގައި ހައި އިމްޕެކްޓު ކޮމިއުނިޓީ ޑިވެލޮޕްމަންޓް ޕްރޮޖެކްޓުގެ ތިން ވަނަ ފިޔަވަހީގެ އެގްރިމެންޓުގައި ސޮއިކުރެއްވީ ޓްރާންސްޕޯޓު މިނިސްޓަރު މުހައްމަދު އަމީނާއި ފޮރިން މިނިސްޓަރު ޑރ. އަބްދުﷲ ހަލީލް އަދި އިންޑިއާއިން ރާއްޖެ ކަނޑައަޅާފައިވާ ސަފީރު ޖީ ބަލަސުބްރަމަނިއަމް އެވެ.

މިދިޔަ ސަރުކާރުގައި ފެށި އާރުޓީއެލްގެ ހިދުމަތް ފުޅާކުރުމުގެ އެއްބަސްވުމުގެ ދަށުން ދޭ 100 މިލިއަން ރުފިޔާއަށް ބަންނަން ނިންމާފައިވާނީ 12 ފެރީ އެވެ.

ޓްރާންސްޕޯޓް މިނިސްޓްރީން ބުނީ ފެރީތައް ބަންނާނެ ބަޔަކު ހޯދަން ވަރަށް އަވަހަށް އިއުލާން ކުރާނެ ކަމަށެވެ.

އާރްޓީއެލް ފެރީގެ ހިދުމަތް ފުޅާކުރުމަށް ކުރާ މަސައްކަތުގެ ދަށުން އަންނަ މަހު ރ. އަތޮޅުގައި ފެރީގެ ހިދުމަތް ފެށުމަށް ވަނީ ނިންމާފަ އެވެ. އަދި ޖުލައި މަހު ބ. އަތޮޅުގައި އާރްޓީއެލް ފެށުމަށްވެސް މިހާރު ދަނީ ތައްޔާރުވަމުންނެވެ.

އާރްޓީއެލްގެ ފެރީތައް މައިގަނޑު ގޮތެއްގައި ބަދެފައިވަނީ ގަލްފް ކްރާފްޓާއި އަލްޝާލީ ކުންފުނިންނެވެ.

މިއަހަރު ނިމޭއިރު ރާއްޖޭގެ ހުރިހާ ރަށެއް ފެރީގެ ނިޒާމަކުން ގުޅާލުމަށް ސަރުކާރުން ވަނީ ނިންމާފަ އެވެ. ފެރީގެ ހިދުމަތް މުޅި ރާއްޖެއަށް ލިބޭއިރު ހިދުމަތް ދިނުމުގައި 80 އެއްހާ ލޯންޗު ބޭނުންކުރާނެ އެވެ.