ދުބާއީ ދަތުރަށް ފަހު ރައީސްގެ އަނބިކަނބަލުން ސާޖިދާ ރާއްޖެ ވަޑައިގެންފި

މަރިޔަމް އަނާ

20 ޖޫން 2025 - 14:02

0 comments

ހަތްވަނަ މާކް ފައުންޑޭޝަން ފަސްޓް ލޭޑީސް އިނީޝިއޭޓިވް (އެމްއެފްއެފްއެލްއައި) ސަމިޓްގައި ބައިވެރިވެވަޑައިގަތުމަށްޓަކައި ރައީސްގެ އަނބިކަނބަލުން މެޑަމް ސާޖިދާ މުޙައްމަދު ޔުނައިޓެޑް އަރަބް އެމިރޭޓްސްގެ ދުބާއީއަށް ކުރެއްވި ދަތުރުފުޅު ނިންމަވާލައްވައި، އެނބުރި މިއަދު ރާއްޖެއަށް ވަޑައިގެންފި އެވެ.

މެރކް ފައުންޑޭޝަންގެ ފަރސްޓް ލޭޑީސް އިނީޝިއޭޓިވް ސަމިޓްގެ 7ވަނަ ބައްދަލުވުން ކުރިއަށްދިޔައީ މި މަހުގެ 18 އަދި 19ގައި ޔޫއޭއީގައެވެ. މި ބައްދަލުވުން ފެށުމުގެ ގޮތުން ބޭއްވި ހަފްލާހައި ރައީސްގެ އަނބިކަނބަލުން ވަނީ ތަގުރީރު ކުރައްވާފައެވެ.

އެ ތަގުރީރުތަކުގައި އިޖުތިމާއީ ގޮތުން ދިމާވާ ބޮޑެތި ގޮންޖެހުންތަކުން އަރައިގަތުމާއި، އަންހެން ކުދިންގެ ތައުލީމަށް ވަކާލާތުކުރުމާއި، އަންހެނުން ބާރުވެރިކުރުވުމާއި، ހުނަރު މަދުވެފައިވާ ދާއިރާތައް ކުރިއަރުވައި، އިންސާނީ ވަސީލަތްތައް އިތުރުކުރުމަށް ވަނީ ވަކާލާތުކުރައްވާފަ އެވެ.

މީގެ އިތުރުން، މި ސަމިޓުގައި މިދިޔަ އަހަރު ޓެންޒޭނިއާގައި ބޭއްވި "މާކް ފައުންޑޭޝަން އެފްރިކާ އޭޝިއާ ލުމިނަރީ"ގެ 11 ވަނަ އެޑިޝަނަށް ފަހު މާކް ފައުންޑޭޝަނާއެކު މިހާރު ކުރިއަށްދާ މަސައްކަތްތައް ކުރިއަށްދާ ގޮތް އެކަމަނާ ވަނީ ބައްލަވާލައްވާފަ އެވެ.

މިއަހަރުގެ ފަސްޓް ލޭޑީސް އިނީޝިއޭޓިވް ސަމިޓުގައި އެފްރިކާ އަދި އޭޝިއާގެ 14 ގައުމެއްގެ ފަސްޓް ލޭޑީން ބައިވެރިވެވަޑައިގެންނެވި އެވެ. މިއަހަރުގެ ބައްދަލުވުން ހާއްސަ ކޮށްފައިވަނީ އިޖުތިމާޢީ ގޮތުން ދިމާވާ މައްސަލަތަކަށެވެ.

އެގޮތުން، ދަރިމައިވުމުގައި ހުރި ދަތިތަކާއި އަންހެން ކުދިންނަށް ތަޢުލީމު ފޯރުކޮށްދިނުމުގެ މުހިންމު ކަމަށާއި އަންހެނުން ބާރުވެރިކުރުމާއި ސިއްޙީ ދާއިރާ ކުރިއެރުވުމާ ގުޅޭގޮތުން ވަނީ މަޝްވަރާ ކުރައްވާފަ އެވެ.