މަސްދޯނިތަކަށް 13 ރަށަކުން އެސްޓީއޯ ރޭޓުގައި ތެޔޮ ލިބޭނެ ގޮތް ހަދައިފި

އިބްރާހިމް އިމާދު

21 އޭޕްރީލް 2026 - 11:53

0 comments

ފޮޓޯ: ލޯކަލް ފޮޓޯގްރަފީ

މަސްވެރިކަން ކުރާ ހުރިހާ ދޯނިފަހަރަށް އެސްޓީއޯ ރޭޓުގައި މާދަމާ އިން ފެށިގެން ތެޔޮ ލިބޭނެ ކަމަށް ފިޝަރީޒް މިނިސްޓްރީން ބުނެފި އެވެ.

ފިޝަރީޒް މިނިސްޓްރީން މިއަދު ބުނީ ފަހި ހަކަތައިގައި ރަޖިސްޓްރީވެފައިވާ ދޯނިތަކަށް ސަބްސިޑައިޒް އަގުގައި 13 ރަށަކުން ތެޔޮ ލިބޭނެ އިންތިޒާމް މިހާރު ހަމަޖެހިފައިވާ ކަމަށެވެ. އެ މިނިސްޓްރީން ބުނި ގޮތުގައި، ފަހި ހަކަތައިގައި ރަޖިސްޓްރީ ވެފައިވާ ދޯނިތަކަށް ސަބްސިޑައިޒް އަގުގައި ތެޔޮ ގަންނަން ލިބޭނެ އެވެ.

ސަބްސިޑައިޒް އަގުގައި ތެޔޮ ގަންނަން ލިބޭނެ ރަށްތަކަކީ ހއ. އިހަވަންދޫ، ހދ. ހަނިމާދޫ، ށ. މިލަންދޫ، ރ. ދުވާފަރު، ބ. އޭދަފުށި، ޅ. ނައިފަރު، ކ. ހިންމަފުށި، ފ. ނިލަންދޫ، ގއ. ކޫއްޑޫ، ފުވައްމުލައް، އައްޑޫ ހުޅުމީދޫ އަދި ހުޅުމާލެ ޖެޓީންނެވެ.

މެދުއިރުމަތީގެ ހަނގުރާމައާ ގުޅިގެން ތެލުގެ އަގަށް ގެނައި ބަދަލާ އެކު އެސްޓީއޯ އިން ޑީސަލް ލީޓަރެއް މިހާރު ވިއްކަނީ 17.54ރ. އަށެވެ.

މަސްވެރިންނަށް ތެޔޮ ލިބުމުގައި ދަތިވާކަމުގެ ކަންބޮޑުވުން ދޭތެރެއަކުން ފެންމަތިވެއެވެ. އެކަމަކު، މިނިސްޓަރު އަހުމަދު ޝިޔާމް ވަނީ އެއްވެސް މަސްވެރިއަކަށް ތެޔޮ ލިބުމުގައި ދައްޗެއް ކުރިމިތިވިޔަ ނުދޭން ސަރުކާރުން މަސައްކަތްކުރަމުން އަންނަ ކަމަށެވެ.