އދ.ގެ އާންމު މަޖިލީހުގެ ރައީސުންގެ ބައްދަލުވުމަކަށް ޝާހިދު ޗައިނާގައި

ޔޫނުސް އިބްރާހިމް

11 މެއި 2026 - 21:02

0 comments

އެމްޑީޕީގެ ރައީސް އަދި ކުރީގެ ހާރިޖީ ވަޒީރު ޢަބްދުﷲ ޝާހިދު، އދ. ގެ އާންމު މަޖިލީހުގެ ރައީސުންގެ ކައުންސިލް، ކައުންސިލް އޮފް ދަ ޕްރެޒިޑެންޓްސް އޮފް ދަ ޖެނެރަލް އެސެމްބްލީގެ ބައްދަލުވުމެއްގައި ބައިވެރިވެވަޑައިގަތުމަށް ޗައިނާގެ ޝަންހާއީއަށް ފުރާވަޑައިގެންފި އެވެ.

ޝާހިދުގެ މި ދަތުރުފުޅަކީ ޗައިނާގެ ޝެންހައި ގައި ބާއްވާ ޔުނައިޓެޑް ނޭޝަންސްގެ އާންމު މަޖިލީހުގެ ރައީސުންގެ ބައްދަލުވުމުގައި ބައިވެރިވުމަށް ކުރައްވާ ދަތުރުފުޅެކެވެ.

އދ. ގެ އާންމު މަޖިލީހުގެ ރައީސްކަން ކުރެއްވި ބޭފުޅުންގެ ތެރެެއިން މިހާރު ދުނިޔޭގައި ތިއްބެވި 21 ރައީސުންގެ ތެރެއިން 12 ރައީސަކު މިބައްދަލުވުމުގައި ބައިވެރިވެ ވަޑައިގަންނަވާ ކަމަށް ޝާހިދު ވިދާޅުވި އެވެ.

މިދިޔަ އަހަރު ސައުދީ އަރަބިއްޔާގެ ރިޔާދު، ގަތަރުގެ ދޯހާ އަދި ސްލޮވާކިއާގެ ބްރަޓިސްލާވާގައި ބޭއްވި މި ކައުންސިލްގެ ބައްދަލުވުންތަކުގައިވެސް އެ މަނިކުފާނު ބައިވެރިވެވަޑައިގެން، ބައިނަލްއަގުވާމީ ސުލްހައާއި ތަރައްގީއަށް މުހިންމު ހިޔާލުތަކެއް ހުށަހަޅުއްވާފައިވެ އެވެ.

އދ. ގެ އާންމު މަޖިލީހުގެ 76 ސެޝަންގެ ރިޔާސަތާއި ޝާހިދު ރަސްމީކޮށް ހަވާލުވެ ވަޑައިގެންނެވީ ސެޕްޓެމްބަރު 2021 ގަ އެވެ. މިއީ ދިވެހި ތާރީހުގައި ވެސް ދިވެއްސަކަށް މިފަދަ ޝަރަފެއް ލިބިވަޑައިގެންނެވި ފުރަތަމަ ފަހަރެވެ.