މާލެއާއި ވިލިމާލޭގެ މަގުތައް ޑިޒައިންކުރަން ޗައިނާގެ ޓީމެއް!

އައިމިނަތު ޝިޔާޒާ

01 ޖޫން 2026 - 13:15

0 comments

ޗައިނާގެ ހިލޭ އެހީގައި މާލެ އާއި ވިލިމާލޭގެ މަގުތައް ހަދަން ނިންމާފައިވާތީ އެެ ދެ ތަނު މަގުތައް ބަލަން ޗައިނާ ރެއިލްވޭ ޑިޒައިން ކުންފުނީގެ ޓީމެއް މާލެ އަތުވެއްޖެ އެވެ.

ރާއްޖޭގައި ހުންނަވާ ޗައިނާގެ ސަފީރު ކޮންގް ޒިއަންހުއާ އެކްސްގައި ކުރެއްވި ޕޯސްޓެއްގައި ވިދާޅުވީ ޗައިނާ ރެއިލްވޭ ޑިޒައިން ކުންފުނީގެ ޓީމެއް މާލެ އާއި ވިލިމާލޭގެ މަގުތަކުގެ ހާލަތު ބެލުމަށް އިއްޔެގެ ވަގުތެއްގައި ރާއްޖެ އައިސްފައިވާ ކަމަށެވެ.

ސަފީރު ވިދާޅުވީ މަގުތަކުގެ ހާލަތު ބެލުމަށްފަހު ޗައިނާގެ ޓީމުން މަގުތައް ޑިޒައިން ކުރުމުގެ މަސައްކަތް ފަށާނެ ކަމަށެވެ.

އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް މީގެކުރިން ވިދާޅުވީ ޗައިނާގެ ޓީމަކުން ރާއްޖެ އައިސް މަގުތައް ޑިޒައިން ކުރުމާއެކު އެ މަޝްރޫއުގެ ކޮންޓްރެކްޓަރު ޗައިނާ ސަރުކާރުން ކަނޑައަޅާނެ ކަމަށެވެ.

މި މަޝްރޫއާ ގުޅޭ ގޮތުން މީގެ ކުރިން ވެސް ޗައިނާގެ ޓީމުތަކެއް އެކި ފަހަރު މަތިން ރާއްޖެ އައިސްފައިވެ އެވެ.

މިދިޔަ މަހުގެ ކުރީކޮޅު ރައްޔިތުންގެ މަޖިލީހުގައި ކޮންސްޓްރަކްޝަން މިނިސްޓަރު ޑރ. މުހައްމަދު މުއްތަލިބް ވިދާޅުވެފައި ވަނީ މާލޭގެ މަގުތަކުގެ ޑިޒައިންގެ މަސައްކަތަށް އެ މަހުގެ ތެރޭގައި ޗައިނާގެ ޓީމެއް އަންނާނެ ކަމަށެވެ. އަދި އެ މަސައްކަތް ނިމުމުން މަގު ހެދުމުގެ މަޝްރޫއުގެ ކޮންޓްރެކްޓަރު ހޮވުމަށް ޗައިނާ ސަރުކާރުން ޓެންޑަ ކުރާނެ ކަމަށް ވެސް މިނިސްޓަރު ވިދާޅުވެފައިވެ އެވެ.