ހައްޖުވެރިންގެ ފުރަތަމަ ގްރޫޕް ރާއްޖެ އަތުވެއްޖެ

ޔޫނުސް އިބްރާހިމް

06 ޖޫން 2026 - 08:08

0 comments

ރާއްޖެ އިން މި އަހަރު ހައްޖަށް ދިޔަ މީހުންގެ ތެރެއިިން ފުރަތަމަ ގްރޫޕް ރޭ އެނބުރި އަތުވެއްޖެ އެވެ.

ދިވެހިރާއްޖެއިން މިއަހަރު ހައްޖަށް ދިޔަ ފަރާތްތަކުން މައްކާއަށް ގޮސްފައިވަނީ، މިދިޔަ މަހުގެ 15 ވަނަ ދުވަހުން ފެށިގެންނެވެ. 4 ދުވަހެއްގައި އޮތް ޖުމުލަ 4 ފްލައިޓުން ޙައްޖުވެރިން ދަތުރުކޮށްފައި ވެއެވެ. ދިވެހިން މިފަހަރު މައްކާއަށް ދަތުރުކުރީ، ސައުދިއާ އަދި މޯލްޑިވިއަން އެއަރލައިންގެ ފްލައިޓުގަ އެވެ.

ޙައްޖުވެރިން ރާއްޖެ އައުމަށްވެސް ހަމަޖެހިފައިވަނީ، ޖުމްލަ 4 ފްލައިޓެއްގަ އެވެ. ރޭ ފުރަތަމަ ފްލައިޓް އައިސްފައިވާއިރު ދެން ބާކީ ފްލައިޓުތައް އަންނާނީ، އާދިއްތަ، ހޯމަ އަދި އަންގާރަ ދުވަހުއެވެ.

މިއަހަރު ރާއްޖެއިން ޖުމްލަ 1،019 މީހަކު ހައްޖަށް ދިޔަ އެވެ. އެ އެންމެންގެ ވެސް ހާލު ރަނގަޅު ކަމަށް އިސްލާމިކް މިނިސްޓްރީން ބުނެފައިވެ އެވެ.

މިދިޔަ އަހަރެކޭ އެއްގޮތަށް މިއަހަރުވެސް ދިވެހި ހައްޖުވެރިން މާލެއިން މައްކާއަށް ފުރާފައިވަނީ މައްކާ ރޫޓު އިނީޝިއޭޓިވްގެ ދަށުން ސަޢުދީ ޢަރަބިއްޔާގެ އިމިގްރޭޝަންގެ ހުރިހާ މަރުޙަލާއެއް ފުރިހަމަކުރުމަށްފައެވެ.

މައްކާ ރޫޓް އިނިޝިއޭޓިވްގައި ދިވެހިރާއްޖެ ހިމަނައިދިނުމަށް ސައުދީ އަރަބިއްޔާގެ ސަރުކާރުން ނިންމީ 1446 ވަނަ އަހަރުގެ ހައްޖު މޫސުމުގައެވެ. މި އިނިޝިއޭޓިވްގައި އާއްމުކޮށް ހިމަނަނީ ގިނަ އަަދަދެއްގެ މީހުން ހައްޖަށް ފޮނުވާ ގައުމުތަކެވެ.