އަންނަ އަހަރަކީ އެންމެ ގިނަ މަޝްރޫއު ނިންމޭނެ އަހަރު: ރައީސް

އަބްދުﷲ މައުރޫފް

14 އޯގަސްޓް 2026 - 19:37

0 comments

ރާއްޖޭގެ އުތުރުން ފެށިގެން ދެކުނަށް ތަރައްގީގެ މަޝްރޫއުތައް ކުރިއަށްދާ ކަމަށާއި އަންނަ އަހަރަކީ އެންމެ ގިނަ މަޝްރޫއުތައް ނިންމައިލެވޭނެ އަހަރު ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވީ، ސިލްސިލާ ޕޮޑްކާސްޓް "ދަ ޕަލްސް"ގެ 6 ވަނަ އެޕިސޯޑްގައި ވާހަކަފުޅުދައްކަވަމުންނެވެ. ރައީސްގެ އޮފީހުގެ މީސްމީޑިއާ މަންސަތަކުގައި މިއަދު ޝާއިއުކުރެވުނު މި އެޕިސޯޑް ހާއްސަ ކުރެވިފައިވަނީ ރާއްޖޭގެ އެކިކަންކޮޅުތަކުގައި ހިނގަމުންދާ އުމްރާނީ ތަރައްގީގެ މަޝްރޫއުތަކަށެވެ.

އެގޮތުން، ޒަމާނީ ފެންވަރުގެ ކައުންސިލް އިދާރާތައް ބިނާކުރުމަށް ފަށާފައިވާ މަޝްރޫއުތަކުގެ މަސައްކަތްތައް ނިންމައި، އަންނަ އަހަރުގެ މެދު ތެރޭގައި އެ އިދާރާތަކުގެ ބޭނުން ހިފޭނެ ކަމުގެ އުއްމީދު އެބަ އޮތް ކަމަށް ރައީސް ވިދާޅުވި އެވެ.

އެ ކަމުގެ އިތުރަށް، ކައުންސިލް އިދާރާތަކުގެ ތަރައްގީއަށް ގިނަ މަޝްރޫޢުތަކެއް ކުރިއަށްދާ ކަމަށާއި ކުރިއަށް އޮތް ދެ އަހަރެއްހާ ދުވަހުގެ ތެރޭގައި 100 ވަރަކަށް ރަށުގައި، ކައުންސިލް އިދާރާތައް ހިންގާނީ އާ އިމާރާތްތަކެއްގައި ކަމަށް ގަބޫލުކުރައްވާ ކަމަށް އެ މަނިކުފާނު ވިދާޅުވި އެވެ.

"އަޅުގަނޑު އުންމީދު ކުރެވެނީ ހަމަ ވަރަށް ބޮޑަށް ގަބޫލުކުރެވޭ މިއަންނަ އަހަރުގެ މެދުތެރެއަށްދާއިރު މި 55 ރަށުގެ ކައުންސިލް އިދާރާތައް ނިމިގެން ބޭނުންކުރަން ފެށޭވަރު ކުރެވޭނެ،" ރައީސް ވިދާޅުވި އެވެ.

އެ މަޝްރޫތަކުގެ އިތުރުންވެސް ކައުންސިލް އިދާރާތަކުގެ މަޝްރޫއުތައް އެކި މަރުހަލާތަކުގައި ހިނގަމުންދާ ކަމަށާއި އެ މަޝްރޫއުތައްވެސް އަހަރެއްހާ ދުވަސް ތެރޭގައި ނިމޭނެ ކަމަށް ރައީސް ވިދާޅުވި އެވެ.

މި މަޝްރޫއުތަކުގެ އިތުރުން 50 ރަށެއްގައި ކައުންސިލް އިދާރާ އެޅުމަށް ޗައިނާ ސަރުކާރުން ހިލޭ އެހީ ލިބިފައިވާކަން ފާހަގަ ކުރައްވާ ރައީސް ވިދާޅުވީ މިހާރު ކުރިއަށްދަނީ އެ މަޝްރޫއު ހަވާލު ކުރުމަށްޓަކައި ކުރަންޖެހޭ މަސައްކަތްތައް ކަމަށާއި އެ މަޝްރޫއުގެ ދަށުން ގިނަ ރަށްރަށުގެ ކައުންސިލް އިދާރާގެ މަސައްކަތް ކުރިއަށް އޮތް ދެ އަހަރެއްހާ ދުވަސް ތެރޭގައި ނިންމާލެވޭނެ ކަމަށެވެ.

މިހާރު ތަރައްގީ ކުރާ ތިލަމާލޭ ބްރިޖުގެ މަސައްކަތުގެ އަދާހަމަ ވެސް މިއަދުގެ އެޕިސޯޑުގައި ރައީސް ހިއްސާކުރެއްވި އެވެ. މިގޮތުން، ހަލުވި ދުވެލީގައި މި މަޝްރޫއު މިހާރު ކުރިއަށް ދާކަމަށާއި ލަސްތަކެއްނުވެ، ބުރިޖުގެ މަޝްރޫއު ނިމޭނެކަމަށް ގަބޫލު ކުރައްވާ އެ މަނިކުފާނު ވިދާޅުވި އެވެ.

މި އެޕިސޯޑު ނިންމަވާލައްވަމުން ރައީސް ވަނީ، އެ މަނިކުފާނުގެ ސަރުކާރުން މިހާރު ކުރިއަށްގެންދާ އެންމެ ބޮޑު މަޝްރޫއަކަށް ވާނީ، މާލެއިން ތިލަފުށްޓަށް ޕޯޓް ބަދަލުކުރުމުގެ މަޝްރޫޢުކަން ފާހަގަކުރައްވާފަ އެވެ. އަދި، އަންނަ އަހަރުގެ ނޮވެމްބަރު މަހުގެ 11 ވަނަ ދުވަހަށް މިކަން ފުރިހަމަ ވާނެކަމުގެ ޔަގީންކަން އެ މަނިކުފާނު ވަނީ ދެއްވާފަ އެވެ.

ފާހަގަކުރެވޭ ގޮތުގައި، ސަރުކާރުން ފެށި ގިނަ މަޝްރޫއުތަކެއް ކުރިއަށް ނުދާ ކަމުގެ ޝަކުވާ އާންމުން ކުރެއެވެ. އަދި، އެކި ދާއިރާއަށް ނިސްބަތްވެވަޑައިގަންނަވާ ކައުންސިލަރުންނާއި މެންބަރުން ވެސް އެ ކަން ފާހަކުރައްވަ އެވެ.