ލިޔުންތެރިން ވާން ޖެހޭނީ އަމާނާތްތެރި ބަޔަކަށް: ރައީސް

އިސްމާއިލް ރިޒާ

08 ޖުލައި 2026 - 12:33

0 comments

ލިޔުންތެރިން ވާން ޖެހޭނީ ގައުމަށް އަމާނާތްތެެރި ގައުމު ދެކެ ލޯބިވާ ބަޔަކަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރާއްޖޭގައި ލިޔުންތެރިންގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ޖުލައި 8 ވަނަ ދުވެހެވެ.

ދުވަހާ ގުޅިގެން ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ މާތްވެގެންވާ އިސްލާމްދީނަކީ، އުނގަންނައިދިނުމާއި ތެދު މައުލޫމާތު ފެތުރުމަށް އަދި ލިޔުންތެރިކަން ކުރިއެރުވުމަށް ބާރުއަޅާ ދީނެއް ކަމަށެވެ.

"‏ދިވެހި ލިޔުންތެރިން ވާން ޖެހޭނީ، މި ގައުމު އަބަދުމެ ފަހުރުވެރި ވާނެ މި ޤައުމަށް ފާގަތި ވާނެ ގޮތަށް ލިޔާ އަމާނާތްތެެރި ގައުމު ދެކެ ލޯބިވާ ބަޔަކަށް." އެ މަނިކުފާނު ވިދާޅުވި އެވެ.

ދިވެހިރާއްޖޭގެ ލިޔުންތެރީންގެ ދުވަސް ފާހަގަކުރަނީ ފުރަތަމަ މަޖައްލާއެއް ނެރުނީ 1933ވަނަ އަހަރުގެ ޖުލައި މަހުގެ 8ވަނަ ދުވަހު ކަމަށް ވާތީ އެވެ. އެ މަޖައްލާގެ ނަމަކީ "އަލްއިޞްލާހު"އެވެ. ނަމަވެސް ރާއްޖޭގައި ރަސްމީކޮށް މި ދުވަސް ފާހަގަކުރަން ފެށީ ޖުލައި 1993 ވަނަ އަހަރުގެ ޖުލައި މަހުގެ 8 ވަނަ ދުވަހުގަ އެވެ.

ދިވެހި ތާރީހަށް ބަލާއިރު، ދިވެހިރާއްޖެ ބިނާކުރުމުގައި ދިވެހި ލިޔުންތެރީން ވަނީ ޒިންމާދާރު މުހިންމު މަސައްކަތްތަކެއް ކުރައްވައިފަ އެވެ. ދީނީ ޢިލްމުވެރީން ދީނީ ރޮނގުންނާއި އަދަބީ ޢިލްމުވެރީން އަދަބީ ރޮނގުންނެވެ. ތާރީހު އިލްމުވެރީން ތާރީހީ ރޮނގުންނެވެ. ނޫސްވެރީންނާއި ސިޔާސީ ބޭފުޅުން އެދެ ދާއިރާއިން މަސައްކަތްކޮށްފައި ވެއެވެ.