ބީއެމްއެލްއިން ދެއަހަރާއި ބައިގެތެރޭ، 1.7 ބިލިޔަން ޑޮލަރު ވިއްކައިފި

އަބްދުﷲ މައުރޫފް

12 ޖުލައި 2026 - 12:09

0 comments

ބޭންކް އޮފް މޯލްޑިވްސް ބީއެމްއެލްއިން ވޭތުވެދިޔަ 2 އަހަރާއި ބައިގެ މުއްދަތުގެ ތެރޭގައި ކަސްޓަމަރުންގެ އެކި ބޭނުންތަކަށް ރެކޯޑް އަދަދަކަށް ބޭރު ފައިސާ ވިއްކާފައިވާކަން އެ ބޭންކުން ހާމަކޮށްފި އެވެ.

2024 ވަނަ އަހަރުގެ ޖަނަވަރީ މަހުން ފެށިގެން 2026 ވަނަ އަހަރުގެ ޖޫން މަހުގެ ނިޔަލަށް ބޭންކުން ވަނީ ޖުމްލަ 1.7 ބިލިޔަން ޑޮލަރު ވިއްކާފަ އެވެ.

ބީއެމްއެލްއިން އާންމުކުރި މައުލޫމާތުގައިވާ ގޮތުން، ވޭތުވި ފަސް އަހަރު ތެރޭގައި ބެންކުން ކަސްޓަމަރުންނަށް 2.7 ބިލިއަން ޑޮލަރު ވިއްކާފައިވެއެވެ. އޭގެ ތެރެއިން 1.7 ބިލިއަން ޑޯލަރު ވިއްކާފައި ވަނީ ފާއިތުވި 30 މަސް، ނުވަތަ ޖަނަވަރީ 2024އިން މި އަހަރުގެ ޖޫން މަހާ ދޭތެރޭ ކަމަށް ތަފާސްހިސާބުގައިވެއެވެ.

ބީއެމްއެލްއިން ބުނި ގޮތުގައި، ވިއްކައިފައިވާ ޑޮލަރުގެ އެންމެ ބޮޑު ހިއްސާއެއް އަދާކުރަނީ ދިވެހި ރުފިޔާ އެކައުންޓްތަކުން ކާޑު މެދުވެރިކޮށް ކަސްޓަމަރުން ކޮށްފައިވާ މުއާމަލާތްތަކެވެ. އެ މުއާމަލާތްތައް ވަނީ، 2021އިން 2023އާ ދެމެދާ އަޅައިބަލާއިރު، ދެގުނައަށްވުރެ ބޮޑަށް އިތުރުވެފައި ކަމަށް އެ ބެންކުން ބުންޏެވެ. އެގޮތުން އެ ދާއިރާއިން ޑޮލަރު ވިއްކި މިންވަރު 102 ޕަސެންޓް އިތުރުވި ކަމަށް ބީއެމްއެލްއިން ފާހަގަކުރިއެވެ.

ބީއެމްއެލްއިން ޑޮލަރު ވިއްކާފައިވާ އިތުރު ދާއިރާތަކާއި، އެ ދާއިރާތަކުން ފާއިތުވި 30 މަހު ޑޮލަރު ވިއްކި މިންވަރު އިތުރުވި ވަރަށް ބަލާއިރު:

ޓީޓީއައި ރެމިޓަންސް ފޮނުވުމަށް: 126 މިލިއަން ޑޮލަރުގެ އިތުރުވުމެއް
ތައުލީމާއި ބޭސްފަރުވާއަށް: 67 މިލިއަން ޑޮލަރުގެ އިތުރުވުމެއް
ރާއްޖޭން ބޭރަށް ދަތުރުކުރާ ފަރާތްތަކަށް: 109 މިލިއަން ޑޮލަރުގެ އިތުރުވުމެއް

ބޭންކުން މަހެއްގެ މައްޗަށް ބޭރު ފައިސާ ވިއްކާ މިންވަރު މިދިޔަ ފަސް އަހަރު ތެރޭގައި ވަނީ ގާތްގަނޑަކަށް ހަތަރު ގުނަ އިތުރުވެފަ އެވެ. އެގޮތުން 2021 ވަނަ އަހަރު މަހެއްގެ މައްޗަށް އެވްރެޖްކޮށް 21 މިލިއަން ޑޮލަރު ވިއްކާފައިވާއިރު، 2026 ވަނަ އަހަރުގެ ފުރަތަމަ ހަ މަސްދުވަހުގެ ތެރޭގައި މި އަދަދު ވަނީ މަހަކު 80 މިލިއަން ޑޮލަރަށް އިތުރުވެފަ އެވެ.

ރާއްޖެއަކީ އިމްޕޯޓަށް ވަރަށް ބޮޑަށް ބަރޯސާވާ ގައުމަކަށް ވެފައި، ވަރަށް ގިނަ ބޭނުންތަކަށް ދިވެހީން ބޭރަށް ދަތުރުކުރާއިރު ޑޮލަރުގެ މުހިންމުކަން ބޮޑެވެ. ނަމަވެސް ފާއިތުވި މަސްތަކުގައި ޑޮލަރުގެ އަގު އުފުލުމާއި ޑޮލަރު ލިބުން ދަތިވުމުގެ ކަންބޮޑުވުންތައް އޮވެ އެވެ.

ޑޮލަރަށް މަރުކަޒީ ބެންކުން ކަނޑައަޅައިފައިވާ އަގަކީ 15.42އެވެ. ނަމަވެސް، ދިވެހީން އެންމެ ގިނައިން ޑޮލަރު ގަންނަން ޖެހެނީ ކަޅު ބާޒާރުން ކަމަށްވާއިރު އެގޮތަށް ޑޮލަރު ލިބޭ އަގު 20 ރުފިޔާއިން މަތީގައި ހުންނަތާ އެތައް މަހެއް ވަނީ ވެފައެވެ.