ކައުންސިލް ބިން އަތުލާ ބިލާ ހޯރަފުށީ ކައުންސިލުން ދެކޮޅު ހަދައިފި

އަބްދުﷲ މައުރޫފް

23 އޯގަސްޓް 2026 - 10:34

0 comments

ލޯކަލް ކައުންސިލްތަކުގެ ބިންތަކާއި އިމާރާތް ސަރުކާރަށް އަތުލެވޭ ގޮތަށް ލާމަރުކަޒީ ގާނޫނަށް ހުށަހަޅާފައިވާ ބިލާ ހޯރަފުށީ ކައުންސިލުން ދެކޮޅު ކަން ހާމަ ކޮށްފި އެވެ.

މަޖިލީހަށް ލާމަރުކަޒީ ގާނޫނަށް އެ ބިލް ހުށަހެޅުއްވީ މި ސަރުކާރުގެ ސިޔާސަތުތަކަށް ތާއީދު ކުރައްވާ ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރެވެ.

މި ބިލުގެ މައިގަނޑު އެއް އިސްލާހަކީ، ކައުންސިލްތަކުގެ އިހްތިސާސްގައިވާ ބިމާއި ތަންތަން ސަރުކާރަށް ނެގުމުގެ ބާރު ދިނުމެވެ.

އެގޮތުން، ލާމަރުކަޒީ ގާނޫނުގެ 2-56ގެ (ލ)ގެ ފަހަތަށް އިތުރު ކުރާ އަކުރުގެ ގޮތުގައި ބިލުގައި ބަޔާންކޮށްފައިވަނީ:

ލާމަރުކަޒީ ގާނޫނުގައި ނުވަތަ އެހެން ގާނޫނެއްގައި އެހެން ގޮތަކަށް ބަޔާންކޮށްފައިވީ ނަމަ، ކައުންސިލްގެ އިހްތިސާސް ތެރޭގައި ހިމެނޭ ބިމާއި ތަންތަނުގައި، ސަރުކާރުން ތަރައްގީގެ މަޝްރޫއުތައް ހިންގުމަށް އެތަންތަން ކައުންސިލްގެ އިހްތިސާސުން ވަކިކުރުމަށް ވަޒީރުންގެ މަޖިލީހަށް ނިންމިދާނެ
އެ ނިންމުން ވަޒީރުންގެ މަޖިލީހުން ނިންމުމަށް ފަހު، އެކަން ކަމާ ބެހޭ ގައުމީ އިދާރާ [ލޯކަލް ގަވަމަންޓް އޮތޯރިޓީ]ން ކައުންސިލަށް އެންގުމުން، އެ ބިމެއް ނުވަތަ ތަނެއް ކައުންސިލްގެ މިލްކިއްޔާތުން ވަކިވެ، ދައުލަތުގެ ފުރިހަމަ ބާރު ހިނގާ ތަނަކަށް ބަދަލުވެގެން ދާނެ ކަމަށް؛ އަދި އެކަން ކަމާ ބެހޭ އިދާރާއިން އާންމު ކުރަން ވެސް ޖެހޭނެ

ހޯރަފުށީ ކައުންސިލުން މިމަހު 18 ގައި ނެރުނު ބަޔާނުގައިވަނީ، ކައުންސިލްތަކުން ބިންތައް އަތުލެވޭ އިސްލާހަކީ ރައްޔިތުންގެ ބާރާއި، ލާމަރުކަޒީ އުސޫލުން ރާއްޖޭގެ އިދާރީ ދާއިރާތައް ހިންގުމުގެ މަގްސަދާއި ހިލާފު ބިލެއް ކަމަށެވެ. އަދި މި ބިލުގެ ސަބަބުން ހާސިލް ވެގެން ދާނީ ސިޔާސީ މަގްސަދެއް ކަމަށާއި އެހެން ކަމުން ލާމަރުކަޒީ ބާރުގެ ވެރިކަން ނިގުޅައިގަނެ ޑިމޮކްރެޓިކް ވެށި ހީނަރު ކުރުމަށް ހުށައަޅައިފާވާ މި ބިލް މަޖިލީހުގެ ތަޅުމުން ބޭރުކުރުމަށް ހޯރަފުށީ ކައުންސިލްގެ ބަޔާނުގައި ވަނީ ބުނެފަ އެވެ.

ހަންނާންގެ އިސްލާހުން މިހާރަށް ވުރެ ފުޅާ ދާއިރާއެއްގައި ކައުންސިލްގެ މިލްކުގައިވާ ތަންތަން އަތުލުމުގެ ބާރު ސަރުކާރަށް ލިބުމުގެ ފުރުސަތު އޮންނާނެ އެވެ.

ހަންނާން ހުށަހެޅުއްވި ބިލުގައި ދެން ހިމެނެނީ:

އެހެން ގާނޫނުގައި އެހެން ގޮތަކަށް ބަޔާންކޮށްފައިވީ ނަމަވެސް، ރަށެއް ނުވަތަ ސިޓީއެއްގެ ފިޒިކަލް ޕްލޭން ފާސްކޮށް އަމަލުކުރަމަށް ފެށުމުގެ ކުރިން ވެސް، ސަރުކާރުގެ ތަރައްގީގެ މަޝްރޫއެއް ކުރިއަށް ގެންދިޔުމަށް ބިމެއް ހޯދުމަށް އެދޭ ހާލަތުގައި މަޝްރޫއުތަކަށް ބޭނުންވާ ބިން ކައުންސިލުން ގައުމީ އިދާރާއާ ހަވާލު ކުރަން ޖެހޭ
ކައުންސިލްތަކުގެ ސްލޫކީ މިންގަނޑު ތެރޭގައި ރައްޔިތުންގެ މަންފާއަށްޓަކައި ސަރުކާރުން ކުރިއަށް ގެންދާ މަޝްރޫއޫަތަކަށް ފުރިހަމަ އެއްބާރުލުން ދިނުން ހިމެނުމަށް
ކައުންސިލްތަކުން ކޮށްގެން ނުވާނެ ކަންތައްތަކުގެ ތެރޭގައި ސަރުކާރުން ކުރިއަށް ގެންދަން ބޭނުންވާ މަޝްރޫތަކަށް މަގްބޫލު ސަބަބެއް ނެތި ހުރަސްއެޅޭ ފަދަ ގޮތަކަށް އަމަލުކުރުން ނުވަތަ އެފަދަ މަޝްރޫއެއް ހުއްޓޫމަށް މެދުވެރިވާނެ ފަދަ ނިންމުމެއް ނިނުމުން ހިމެނުމަށް

މި ބިލުން ގެންނަ އިސްލާހުތަކަށް އަމަލު ކުރަން ފަށަން އޮތީ މަޖިލީހުން ފާސްކޮށް، ތަސްދީގު ކުރާ ދުވަހުން ފެށިގެންނެވެ.

ކައުންސިލްތަކުގެ ބާރު ހަނިވާ ގޮތަށް ލާމަރުކަޒީ ގާނޫނަށް އިސްލާހު ހުށަހަޅާފައި މި ވަނީ، މިދިޔަ އޭޕްރީލް މަހު ބޭއްވި ކައުންސިލް އިންތިހާބުގައި ސަރުކާރަށް ކުރިމަތިވި ނާކާމިޔާބީއަށް ފަހު އެވެ.

އެ އިންތިހާބުގައި ހުރިހާ ސިޓީތަކާއި ބޮޑެތި ރަށްތަކުގެ ކައުންސިލްތަކުގެ ގޮނޑިތައް ކާމިޔާބުކޮށްފައިވަނީ އިދިކޮޅު އެމްޑީޕީންނެވެ.