ރައީސްގެ ޕޮލިސީ ސެކްރެޓަރީ ނާޒިމް އިސްތިއުފާ ދެއްވައިފި

އަބްދުﷲ މައުރޫފް

14 ސެޕްޓެމްބަރ 2026 - 14:09

0 comments

ރައީސް އޮފީހުގެ ޕޮލިސީ ސެކްރެޓަރީގެ މަގާމުން އަބްދުﷲ ނާޒިމް މިއަދު އިސްތިއުފާ ދެއްވައިފި އެވެ.

ސަރުކާރުގެ ތަރުޖަމާނު މުހައްމަދު ހުސައިން ޝަރީފް ވިދާޅުވީ މިއަދު ހެނދުނު ނާޒިމް އެ މަގާމުން އިސްތިއުފާ ދެއްވާފައިވާ ކަމަށެވެ.

މި ސަރުކާރުގެ ފެށުމުގައި ނާޒިމް އެންމެ ފުރަތަމަ އައްޔަންކުރެއްވީ ރައީސް އޮފީހުގެ ޕަބްލިކް ޕޮލިސީގެ ޕްރިންސިޕަލް ސެކްރެޓަރީގެ މަގާމަށެވެ. އޭގެ ފަހުން ކެބިނެޓަށް ގެނެވުނު ބަދަލުތަކާއެކު ސެޕްޓެމްބަރު 30، 2024 ގައި އޭނާ ހެލްތު މިނިސްޓަރުކަމުގެ މަގާމަށް ބަދަލުކުރެއްވި އެވެ.

ނަމަވެސް މިދިޔަ އޭޕްރީލް މަހުގެ ހަ ވަނަ ދުވަހު ބޭއްވި ލޯކަލް ކައުންސިލް އިންތިހާބަށްފަހު، ސަރުކާރުގެ ހިންގުން ހަރުދަނާކުރުމުގެ ނަމުގައި ކެބިނެޓުގެ 10 މިނިސްޓަރަކު އިސްތިއުފާ ދެއްވިއިރު ނާޒިމްވެސް ވަނީ ހެލްތު މިނިސްޓަރުކަމުން އިސްތިއުފާ ދެއްވާފަ އެވެ. އޭނާ އަލުން ރައީސް އޮފީހުގެ ސީނިއާ މަގާމަކަށް ގެންދެވީ އޭގެ ފަހުންނެވެ.