ޓްރެވެލް އެޖެންޓުންގެ ޓެކްސް ފަސްކޮށްދޭން އެދި މަޖިލީހަށް

ޔޫނުސް އިބްރާހިމް

17 ސެޕްޓެމްބަރ 2026 - 20:34

0 comments

ރާއްޖޭގައި ޑެސްޓިނޭޝަން ޕްރިންސިޕަލް ތަންފީޒު ކުރުމަށް އަންނަ މަހުން ފެށިގެން ބޭރުގެ ޓްރެވެލް އެޖެންޓުންނާއި ޓުއަ އޮޕަރޭޓަރުން އަދި ބުުކިން ޕްލެޓްފޯމުތަކުން %17ގެ ޓެކްސް ނެގުމަށް ގާނޫނަށް ގެނެސްފައިވާ އިސްލާހަށް އަމަލުކުރަން ފަސްކޮށް، ޓޫރިޒަމް ސިނާއަތުގެ ކަންބޮޑުވުންތަކަށް ހައްލު ހޯދައިދިނުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް، މަޖިލީހުގެ ރައީސް އަބްދުއްރަހީމް އަބްދުﷲގެ ކިބައިން އެދިވަޑައިގެންފި އެވެ.

އަންނަ މަހުން ފެށިގެން ބޭރުގެ ޓުއަ އޮޕަރޭޓަރުންގެ އަތުން ޖީއެސްޓީ ނަގަން ފެށުމާ މެދު ޓުއަ އޮޕަރޭޓަރުންގެ ބޮޑެތި ކަންބޮޑުވުންތައް އެބަހުއްޓެވެ.

މީގެ އިތުރުން، ރިސޯޓުތަކަށް ލިބޭ ޑޮލަރު އާމްދަނީގެ %40 ބޭންކުތަކަށް މާރު ކުރަން ޖެހޭ ގޮތަށް ބޭރު ފައިސާއާ ބެހޭ ގާނޫނަށް ގެނައި އިސްލާހު މިހާރު ތަންފީޒު ކުރަން ފަށާފައިވާއިރު، އެ އިސްލާހާ މެދު ރިސޯޓު އިންވެސްޓަރުންގެ ކަންބޮޑުވުންތައް ވެސް އެބަހުއްޓެވެ.

މެންބަރު މުހައްމަދު އިބްރާހިމް، މަޖިލިސް ރައީސަށް މިއަދު ފޮނުއްވި ސިޓީގައި، ބައިނަލްއަގުވާމީ މާކެޓުގެ އިތުބާރު ދެމެހެއްޓޭނެފަދަ އުސޫލުތައް ކަނޑައެޅުމުގެ ފުރުސަތު ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ހޯދައިދިނުމަކީ މަޖިލީހުގެ ޒިންމާއެއް ކަމަށް ދެކިވަޑައިގަންނަވާ ކަމަށް ފާހަގަކުރައްވާ، މަޖިލީހުގެ މާލިއްޔަތު ކޮމެޓީ މެދުވެރިކޮށް މައްސަލަ ބަލައިދިނުމަށް ވަނީ އެދިވަޑައިގެންފަ އެވެ.

ޖީއެސްޓީ ގާނޫނަށް ގެނައި އިސްލާހުތަކާމެދު ހުރި ކަންބޮޑުވުންތައް ފާހަގަކޮށް، ރާއްޖޭގެ ޓޫރިޒަމަށް ދިގު މުއްދަތުގެ ފައިދާ ހޯދައިދިނުމުގެ މަސައްކަތް ކުރުމަށް އުފައްދާފައިވާ 'ޑެސްޓިނޭޝަން ފިއުޗާ' ޖަމްއިއްޔާ އިން ތައްޔާރުކޮށްފައިވާ ރިޕޯޓެއްގައި ފާހަގަކޮށްފައިވާ ކަންތައް މެންބަރުގެ ސިޓީގައި ވަނީ ހިއްސާކުރައްވައިފަ އެވެ.