މަމެން އިންޓަ ސްކޫލް ސައިކްލިން ޗެމްޕިއަންޝިޕް ކާމިޔާބުކަމާއެކު ނިންމާލައިފި

އިސްމާއިލް ރިޒާ

19 ސެޕްޓެމްބަރ 2022 - 03:26

0 comments

ދެ އަހަރުގެ މެދު ކެނޑުމަކަށްފަހު ބޭއްވި "މަމެން" އިންޓަ ސްކޫލް ސައިކްލިން ޗެމްޕިއަންޝިޕް 2022 ކާމިޔާބުކަމާއެކު ނިންމާލައިފިއެވެ.

މިއަހަރު ބާއްވާފައި ވަނީ މަމެން އިންޓަ ސްކޫލް ސައިކްލިން ޗެމްޕިއަންޝިޕްގެ ތިންވަނަ އެޑިޝަނެވެ. މިދިޔަ ހުކުރު ދުވަހާއި ހޮނިހިރު ދުވަހު ހުޅުމާލޭ ފޭސް ދޭއްގެ ސައިކްލިން ޓްރެކްގައި ކުރިއަށް ގެންދިޔަ އިވެންޓްގައި ޖުމުލަ 32 ސްކޫލަކުން 1000 އަށްވުރެ ގިނަ ދުއްވުންތެރިން ބައިވެރިވެފައިވެއެވެ. އޭގެ ތެރެއިން 450 އަށްވުރެ ގިނަ ކުޑަކުދިންވަނީ އެއް ކިލޯމީޓަރުގެ ފަން ރައިޑްގައި ބައިވެރިވެފައެވެ.

ނިމުނު ހަފްތާ ބަންދުގައި އެ ރޭސް ކުރިއަށް ގެންގޮސްފައިވަނީ ހުޅުމާލެ 2 ގެ ސައިކްލިން ޓްރެކްގަ އެވެ.

އެއީ ރާއްޖޭގައި ބޭއްވުނު އެންމެ ފުރަތަމަ 100 ޕަސެންޓް ސޯލާ ޕަވާޑް އިވެންޓް ކަމަށް ދިރާގުން ބުންޏެވެ. އެގޮތުން، އެ ހަރަކާތުގައި ބޭނުންކުރި ކަރަންޓު ނަގާފައިވަނީ އިރުގެ އަލިން ހަކަތަ އުފައްދާ، ޕޯޓަބަލް ޕަވާ ސްޓޭޝަންތަކަކުންނެވެ.

ރޭހުގައި ވާދަކުރި ކޮންމެ އުމުރުފުރާއަކުން ޗެމްޕިއަނަކާއި އަދި ކޮންމެ ޓީމް ޕާސޫޓްގެ އުމުރުފުރާއަކުން ތިން ޗެމްޕިއަން ޓީމް ހޮވި އެވެ. އަދި ކޮންމެ އުމުފުރާއަކުން ޗެމްޕިއަން ސްކޫލެއް ވެސް ހޮވި އެވެ.

"ފަން ރައިޑް" ފިޔަވައި ދެން ހުރި ވާދަވެރި ކެޓަގަރީތަކުން އަންހެން އަދި ފިރިހެން ބައިވެރިންގެ ތެރެއިން ވަނަތައް ހޮވައި، އެ ކުދިންނަށް ހަނދާނީ ލިއުމާއި ފިލާ ދޭނެކަމަށް ބައިކް މޯލްޑިވްސް އިން ވަނީ ބުނެފަ އެެވެ. މި މުބާރާތުގެ އިނާމު ދިނުން އޮންނާނީ މި ހަފްތާގެ ފަހުކޮޅުގަ އެވެ.

މި އިވެންޓުގައި ބައިވެރިވި ކުދިންނާއެކު ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު ވަނީ ވަގުތުކޮޅެއް ހޭދަކޮށްފައެވެ.

މަމެން އިންޓަ ސްކޫލް ސައިކްލިން ޗެމްޕިއަންޝިޕްގެ މައިގަނޑު މަގުސަދަކީ ސްކޫލު ކުދިންގެ މެދުގައި ބައިސްކަލް ދުއްވުމަށް ޝައުގުވެރިކަން އިތުރުކުރުމާއިއެކު، ކުޑައިރުއްސުރެ ދުޅަހެޔޮ ސިއްހަތެއްގައި ދިރިއުޅުން ބައްޓަން ކުރުމަށް އެހީތެރިވެދިނުން ކަމުގައި މުބާރާތް އިންތިޒާމް ކުރާ ފަރާތުން ހާމަކުރެއެވެ.

"މަމެން" އިންޓަސްކޫލް ސައިކްލިން ޗެމްޕިއަންޝިޕްގެ ތިން ވަނަ މުބާރާތް ކުރިން ބާއްވަން ހަމަޖެހިފަ އޮތީ 2020 ވަނަ އަހަރު އެވެ. ނަަމަވެސް، ކޮވިޑްގެ ދުވަސްވަރު ދިމާވި ދަތިތަކާ ހެދި އެ މުބާރާތް ބޭއްވުން ފަސްކުރީ ކަމަށް ދިރާގުން ބުންޏެވެ.

މިއަހަރުގެ ސައިކްލިން ޗެމްޕިއަންޝިޕްގެ ސަޕޯޓިން ޕާޓްނަރުންގެ ތެރޭގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)، މޯލްޑިވްސް ޕޮލިސް ސާވިސަސް، އެމްޓީސީސީ، އެރޯސޯލްޓްސް، ޗޮޕާޓް މޯލްޑިވްސް އަދި އިލާ މޯލްޑިވްސް ހިމެނެއެވެ. ފަސްޓްއެއިޑްގެ ހިދުމަތް ފޯރުކޮށްދީފައި ވަނީ މޯލްޑިވިއަން ރެޑްކްރެސެންޓް (އެމްއާރްސީ) އާއި ހުޅުމާލެ ހޮސްޕިޓަލް އަދި އެމްއެންޔޫ ސްކޫލް އޮފް ނާސިންގެ ވޮލަންޓިއަރުންނެވެ.