ބ. އަތޮޅުގެ ފަޅުރަށެއް ކަމަށްވާ ކެޔޮދޫގައި ވެލާތަކެއް ފެޅި މައްސަލައިގައި ޖޫރިމަނާ ކުރި ހަތް މީހުންގެ ޖޫރިމަނާގެ އަގު 33،000ރ. (ތިރީސް ތިންހާސް ރުފިޔާ)އަށް ކުޑަކޮށްފިއެވެ.

ޖޫރިމަނާ ކުރީ މިކަމުގައި އަމަލީގޮތުން ބައިވެރިވި ފަސް މީހަކާއި އިތުރު ދެ މީހުންނާ އެކު ޖުމްލަ ހަތް މީހެކެވެ.

މި މީހުންގެ ތެރެއިން ކޮންމެ މީހަކު 198،000 ރުފިޔާ އިން ޖޫރިމަނާކޮށް ފައިސާ ދެއްކުމަށް އޭރު ދިނީ 30 ދުވަހެވެ.

ޖޫރިމަނާ ފައިސާ ދެއްކުމަށް އެމީހުންނަށް އަންގާފައިވަނީ މިދިޔަ ޖޫން މަހުގެ 20 ވަނަ ދުވަހު އެވެ.

އެންވަޔަރަންމަންޓް ޕްރޮޓަކްޝަން އޭޖެންސީ (އީޕީއޭއިން) އިން މި މީހުންގެ ޖޫރިމަނާއަށް ލުއި ދިނީ ބަންޑާރަނައިބްގެ ލަފާގެ މަތިންނެވެ. 

މިކަމާ ގުޅިގެން އެންމެ ފުރަތަމަ އީޕީއޭއިން ވަނީ ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާ ބެހޭ ގަވާއިދުގެ ދަށުން މި ހަތް މީހުންގެ ތެރެއިން ކޮންމެ މީހަކު، 198،000ރ. (އެއްލައްކަ ނުވަދިހަ އަށްހާސް ރުފިޔާ) ދައްކާ ގޮތަށް ޖޫން މަހުގެ 20 ވަނަ ދުވަހު ޖޫރިމަނާ ކޮށްފައެވެ. މި ހަތް މީހުން ޖޫރިމަނާކޮށްފައި ވަނީ 30 ދުވަހުގެ ތެރޭގައި އީޕީއޭއަށް ޖޫރިމަނާ ދައްކާ ގޮތަށެވެ.

އެހެންނަމަވެސް އެ ގަވާއިދު ބުނާގޮތުން ނަމަ ހިމާޔަތްކޮށް ރައްކާތެރިކޮށްފައިވާ ދިރޭ އެއްޗަކަށް ގޯނާކޮށްފިނަމަ ޖޫރިމަނާ ކުރެވޭނީ 30،000ރ. އާއި 50،000ރ. އާ ދެމެދުގެ އަދަދަކުންނެވެ. އެގޮތުން އެންވަޔަރަމަންޓް މިނިސްޓްރީން ވަނީ އެޓާނީ ޖެނެރަލްގެ އޮފީލުން ލަފާ ހޯދައި އަލުން މުރާޖައާ ކުރުމަށް ފަހު ކުރިން ޖޫރިމަނާ ކުރި އަދަދު ކުޑަކުރަން ނިންމައިފައެވެ.

އެގޮތުން ނިންމި ނިންމުމަކީ ޖޫރިމަނާ ކުރި ހަތް މީހުންގެ ތެރެއިން ކޮންމެ މީހަކު 33،000 ރުފިޔާ ޖޫރިމަނާގެ ގޮތުގައި ދެއްކުމަށެވެ. އީޕީއޭއިން ވަނީ މި ޖޫރިމަނާ އިއްޔެ އިން ފެށިގެން 30 ދުވަހުގެ ތެރޭ ދެއްކުމަށް އަންގައިފައެވެ.