ދިރިނޫޅެވޭ ވަރަށް ބާވެފައި ހުރި އިމާރާތްތައް ތަޅާލަން ފަށައިފި

މަރިޔަމް އަނާ

18 އޯގަސްޓް 2024 - 00:42

0 comments

މާލޭގައި ދިރިނޫޅެވޭ ވަރަށް ދުވަސްވެފައި ހުރި އިމާރާތްތަކުގެ ލިސްޓުގައިވާ މ. ރަބީއުވިލާ ތާލުމުގެ މަސައްކަތް ސަރުކާރުން މިއަދު ފަށައިފި އެވެ.

މާލޭގައި ފަޅަށް ހުންނަ ބާ އިމާރާތްތަކުގައި މަސްތުވާތަކެތި ބޭނުންކުރާ މީހުން އުޅޭ މައްސަލަ ވަރަށް ބޮޑެވެ. އެ ކަހަލަ ގެތަކުގައި އަލިފާނުގެ ހާދިސާތައް އެކި ފަހަރު މަތިން ހިނގާފައިވެ އެވެ.

ބާވެ، އާއްމުންނަށް ނުރައްކަލެއް ކުރިމަތިވެދާނެ ކަމަށް ބެލެވޭ 11 އިމާރާތެއްގެ ލިސްޓެއް 2019 ގައި އޭރުގެ ޕްލޭނިން މިނިސްޓްރީން އެކުލަވާލާފައި ވެ އެވެ. އެއީ:

1- ހ. ލޮބީ

2- ހ. ތަންބީ

3- ހ. އަސްފަރު

4- މ. އާޝިޔާމަންޒިލް

5- މ. ބުރަދަމާގެ

6- މ. ކައުސަރު

7- މއ. އެވާގްލޯރީ

8- މއ. ކަނބާލިފަރު

9- ހ. ހާޖަރާގެ

10- ހ. ރުއްދޮށިގެ

11- މ. ރަބީއުވިލާ

މިމަސައްކަތް ކުރަނީ މިނިސްޓްރީ އޮފް ސިޓީސް، ލޯކަލް ގަވަރުންމަންޓް އެންޑް ޕަބްލިކް ވާކްސް އިން ކަމަށް އެ މިނިސްޓްރީން ނޫސްތަކަށް މައުލޫމާތު ދީފައިވެ އެވެ.

މ. ރަބީއުވިލާ މިއަދު ތަޅާލުމުގެ މަސައްކަތް ފެށިއިރު އެ ގޭގައި މީހުން ދިރިނޫޅޭތާ ދުވަސްތަކެއް ވަނީ ވެފަ އެވެ. އެހެންވެ މި ގެ ބޭނުންކުރަމުން ދިޔައީ މަސްތުވާތަކެތި ބޭނުންކުރާ މީހުންގެ އައްޑާއެއްގެ ގޮތުގައެވެ.

ޕަބްލިކް ވޯކްސް މިނިސްޓަރު އާދަމް ޝަރީފު ވިދާޅުވީ، ރަބީއުވިލާ ތަޅާލުމުގެ މަސައްކަތް ފެށީ އެ އިމާރާތުގެ ސަބަބުން މީހަކަށް ނުރައްކަލެއް ވެދާނެ ކަމަށް ރައީސް މުއިއްޒަށް ފެނިވަޑައިގަންނަވާތީ ކަމަށެވެ.

ރައީސް ވަނީ މިދިޔަ ހަފުތާގައި މާލޭ ސިޓީ ކައުންސިލާ ބައްދަލުކުރައްވައި މާލޭގައި މި ގޮތަށް ފަޅަށް ދޫކޮށްލައިފައި ހުރި ބާ އިމާރާތްތައް އަވަހަށް ތަޅާލުމަށްޓަކައި އެ ކައުންސިލަށް ބޭނުންވާ އެއްބާރުލުން ސަރުކާރުގެ ފަރާތުން ލިބޭނެ ކަމުގެ ޔަގީންކަން ދެއްވައިފަ އެވެ.