އައްޑޫގެ ޓޫރިޒަމް އިނގިރޭސި މާކެޓަށް ޕްރޮމޯޓު ކުރަނީ

އަހުމަދު ނިހާން

18 އޯގަސްޓް 2024 - 00:56

0 comments

ޓޫރިޒަމް މިނިސްޓަރު އިބްރާހިމް ފައިސަލް

އައްޑޫ ސިޓީގައި މީގެ ކުރިން އިނގިރޭސިން ތިބި ދުވަސްވަރު އެ މީހުން ހަދައިފައިވާ ތަންތަން މަރާމާތުކޮށް، އިނގިރޭސި ފަތުރުވެރިން ގެންނަން މަސައްކަތް ކުރާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް މިއަދު ވިދާޅުވެއްޖެ އެވެ.

ފުރިހަމަ ސިޓީ ބްރޭންޑެއް ތަރައްގީކޮށް ޕްރިމިއާ ބްރޭންޑެއްގެ ގޮތުގައި އައްޑޫ ޕްރޮމޯޓު ކުރުމަށް 'ޑެސްޓިނޭޝަން އައްޑޫ 2024'ގެ ނަމުގައި މިއަދު އައްޑޫގައި ފެށި ސަމިޓު އިފްތިތާހުކޮށް ދެއްވަމުން މިނިސްޓަރު ވިދާޅުވީ އައްޑޫ އަކީ ތާރީހާއި ގުދުރަތީ ރީތިކަމަށް ބަލާއިރު މުއްސަނދި ތަނެއް ކަމަށެވެ. އެކަށީގެންވާ ގޮތަށް އައްޑޫ ބްރޭންޑުކޮށް ދުނިޔޭގެ ފަތުރުވެރިކަމުގެ މައިދާނަށް ނެރެވޭނެ މަގު ތަނަވަސް ކުރަންޖެހޭ ކަމަށް ވިދާޅުވި އެވެ.

ފައިސަލް ވިދާޅުވީ، އިނގިރޭސިން މީގެ ކުރިން އައްޑޫގައި އުޅުނު އިރު ހަދާފައި ހުރި ތަންތަން މިހާރުވެސް އެބަހުރި ކަމަށެވެ. އަދި ހެރިޓޭޖް މިނިސްޓްރީއާ ގުޅިގެން އެ ތަންތަން މަރާމާތު ކުރުމުގެ މަސައްކަތް ކުރައްވާނެ ކަމަށް އޭނާ ވިދާޅުވި އެވެ.

އިނގިރޭސިވިލާތުގައި އޮންނަ ޑަބްލިއުޓީއެމް ފެއާގައި ބައިވެރިވެ، އައްޑޫ ޕްރޮމޯޓް ކުރަން ސިޓީ ކައުންސިލުން ވެސް ނިންމާފައިވާކަމަށް މިނިސްޓަރު ވިދާޅުވި އެވެ.

"ވަރަށް މުއްސަނދު ތާރީހެއް މި އޮންނަނީ އިނގިރޭސިންނާ އެކީ. އިނގިރޭސިވިލާތަކީ މިކަން ކުރަން އެންމެ ރަނގަޅު އެއްތަން،" އޭނާ ވިދާޅުވި އެވެ.

މިނިސްޓަރު ވަނީ އައްޑޫގެ ޓޫރިޒަމް ކުރިއަރުވާ ޕްރޮމޯޓް ކުރުމުގެ މަސައްކަތަށް އެމްއެމްޕީއާރުސީން އެއްބާރުލުން ލިބޭނެ ކަމުގެ ޔަގީންކަން ކައުންސިލަށާއި ސިނާއަތުގައި މަސައްކަތް ކުރާ ފަރާތްތަކަށް ދެއްވައިފަ އެވެ.

ރާއްޖެއާއި އިނގިރޭސިިވާތާ ދެމެދު 1887ގައި ހެދި މުއާހަދާއެއްގެ ދަށުން، އިނގިރޭސި ހިމާޔަތުގައި އޮތް ދުވަސްވަރު އެ ގައުމުގެ ސިފައިން އައްޑޫގައި ވަޒަންވެރިވެގެން ދިރިއުޅުނެވެ. އޭރު އިނގިރޭސިން އައްޑޫގައި އެއާޕޯޓެއް ހަދައި، ކާރުހާނާތައް ހިންގިއެވެ.

އިނގިރޭސިން ބޭނުންކުރި އިމާރާތްތައް ގަމުގައި ހުރި ނަމަވެސް، އެ ތަންތަން މިހާރު ދަނީ ވީރާނާވަމުންނެވެ.

މި ސަމިޓުގައި އައްޑޫގެ މޭޔަރު އަލީ ނިޒާރު ވިދާޅުވީ، ޓޫރިޒަމް ތަރައްގީ ކުރުމަށް އައްޑުއަށް ވުރެ ރަނގަޅު އެހެން ތަނެއް ނޯންނާނެ ކަމަށެވެ. އައްޑު އަކީ އަމިއްލަ ވަންތަ ސިފަތަކުގެ އިތުރުން އިންސާނީ ވަސީލަތްތައް ވެސް އެންމެ ގިނަ އެ ސަރަހައްދު ކަމަށް ވިދާޅުވި އެވެ.

"ޓޫރިސްޓަކު އޮކިއުޕައި ކުރުމަށް 15 ދުވަހުގެ އެކްޓިވިޓީސް ބޭއްވޭނެ ކަންތައްތަކާއި ދެއްކޭނެ މަންޒަރު އެބައޮތް. އެހެންވީމަ ޔަގީން ވަނީ އައްޑޫ ސިޓީގައި ތަރައްގީ ނުވާ ވަކި އެހެން ޓޫރިޒަމެއް އެހެން ތަނެއްގައި ވެސް ނުކުރެވޭނެ،" އޭނާ ވިދާޅުވި އެވެ.