ލަންކާގެ ބޮޑުވަޒީރު ކަމަށް ޑރ. ހަރިނީ

ހަސަން ހަލީމް

24 ސެޕްޓެމްބަރ 2024 - 22:10

0 comments

ސްރީ ލަންކާގެ ބޮޑުވަޒީރު ކަމަށް ޑރ. ހަރިނީ އަމަރަސޫރިޔާ މިއަދު އައްޔަންކުރައްވައިފި އެވެ.

ލަންކާގައި ބޭއްވި ރިޔާސީ އިންތިހާބާ އެކު، އެ ގައުމުގެ ބޮޑު ވަޒީރު ކަމުގެ މަގާމުގައި ހުންނެވި ދިނޭޝް ގުނަވަރްދަނަ އިއްޔެ އިސްތިއުފާ ދެއްވި އެވެ. އޭނާގެ އިސްތިއުފާއާ ގުޅިގެން ތައުލީމީ ދާއިރާގެ ތަޖުރިބާކާރު ޑރ. ހަރިނީ ބޮޑު ވަޒީރު ކަމަށް އައްޔަން ކުރަން ލަންކާގެ އާ ރައީސް އަނޫރާ ކުމާރަ ޑިސަނަޔަކަ މިއަދު ވަނީ ނިންމަވައިފަ އެވެ.

ޑރ. ހަރިނީ ،54، އަކީ ލަންކާގެ ތިންވަނަ އަންހެން ބޮޑުވަޒީރެވެ. މީގެ ކުރިން މި މަގާމު ފުރުއްވާފައިވަނީ ސިރިމާވޯ ބަންޑާރަނާއިކަ އާއި ޗަންދްރިކާ ބަންޑާރަނާއިކަ ކުމާރަތުންގާ އެވެ.

ލަންކާގެ ނޭޝަނަލް ޕީޕަލްސް ޕަވާ (އެންޕީޕީ) ގެ ގާނޫނު ހަދާ މަޖިލީހުގެ މެމްބަރެއްގެ ގޮތުގައި ހުންނެވި ހަރިނީ އަކީ އިލްމީ ދާއިރާގެ އިތުރުން އިންސާނީ ޙައްޤުތަކަށް ވަކާލާތު ކުރައްވާ ބޭފުޅެކެވެ. އަދި ލަންކާގެ އޯޕަން ޔުނިވާސިޓީގެ ސޯޝަލް ސްޓަޑީޒް ޑިޕާޓްމަންޓުގައި ސީނިއާ ލެކްޗަރަރއެއްގެ ގޮތުގައި ވެސް ހަރިނީ މަސައްކަތް ކުރައްވާފައިވެ އެވެ.

ޑރ. ހަރިނީ އަމަރަސޫރިޔާ އަކީ އެގައުމުގެ 16 ވަނަ ބޮޑުވަޒީރެވެ.