ޓްރަމްޕް ވޯޓުން މޮޅުވެ، އަލުން އެމެރިކާގެ ވެރިކަމަށް

ހަސަން ހަލީމް

06 ނޮވެމްބަރ 2024 - 14:55

0 comments

އެމެރިކާގެ ރިޔާސީ އިންތިހާބުގެ ވޯޓުލުން ނިމި ވޯޓު ގުނަމުންދާއިރު, ކުރީގެ ރައީސް ޑޮނަލްޑް ޓްރަމްޕް ކާމިޔާބީ އިއުލާން ކުރައްވައިފި އެވެ.

އިންތިހާބުގެ ވަގުތީ ގޮތުން ނަތީޖާ ދައްކާ ގޮތުން ޑިމޮކްރެޓިކްސްގެ ކެންޑިޑޭޓް އަދި މިހާރުގެ ނައިބު ރައީސް ކަމަލާ ހެރިސްއާ ވާދަކުރައްވައި ޓްރަމްޕް ވަނީ ބޮޑު ތަފާތަކުން ކުރި ހޯއްދަވައިފަ އެވެ.

އެމެރިކާގެ ރިޔާސީ އިންތިޚާބު ކުރަން ބޭނުންވާ 270 އިލެކްޓޯރަލް ވޯޓުގެ ތެރެއިން ޓްރަމްޕް އުޅުއްވަނީ 267 އިލެކްޓޯރަލް ވޯޓުން ކުރީގަ އެވެ. އިންތިޚާބު ކާމިޔާބު ކުރަން ޓްރަމްޕަ ދެން ބޭނުން ވަނީ އެންމެ ތިން އިލެކްޓޯރަލް ކޮލެޖް ވޯޓެވެ. އަދިވެސް ބައެއް ސްޓޭޓްތަކުގެ ވޯޓުގެ ނަތީޖާ އިއުލާންކޮށްފައި ނުވާއިރު، އޭގެ ތެރެއިން ބައެއް ސްޓޭޓްތަކުން ޓްރަމްޕް ކުރި ހޯއްދަވާނެ ކަމަށް މިހާރު ވެސް ވަނީ ބެލެވެ އެވެ.

ކަމަލާ އަށް ލިބިފައި ވަނީ 214 އިލެކްޓަރުންގެ ވޯޓެވެ. އެހެންކަމުން މި އިންތިހާބު ކާމިޔާބު ކުރުމުގެ ފުރުސަތު ކަމަލާ އަށް މިހާރު ވަނީ ބަންދުވެފަ އެވެ.

އާންމުންގެ ވޯޓުން ވެސް މިވަގުތު ބޮޑުތަނުން ކުރީގައި އުޅެނީ ޓްރަމްޕެވެ. ޓްރަމްޕަށް 60.7 މިލިއަން ވޯޓު މިހާތަނަށް ލިބިއްޖެ އެވެ. އެއީ ގުނި ވޯޓުތަކުގެ ތެރެއިން 51 ޕަސެންޓު ވޯޓެވެ. ކަމަލާއަށް ލިބުނީ 56 މިލިއަން ވޯޓެވެ. އެއީ މިހާތަނަށް ގުނި ވޯޓުތަކުގެ ތެރެއިން 47 ޕަސެންޓު ވޯޓެވެ.

ދެން ކަމަލާއަށް އިންތިހާބު ކާމިޔާބު ކުރެވޭނީ ސްވިންގު ސްޓޭޓުތަކުގެ ތެރެއިން ގިނަ ސްޓޭޓުތައް ކާމިޔާބުކޮށްގެންނެވެ. އެކަމަކު ބޮޑު ހަތް ސްވިންގު ސްޓޭޓުގެ ތެރެއިން ޓްރަމްޕު ވަނީ ނޯތު ކެރޮލީނާ ކާމިޔާބުކޮށްފަ އެވެ. އަދި ބާކީ އޮތް ހަ ސްޓޭޓުގެ ތެރެއިން ފަސް ސްޓޭޓުން ޓްރަމްޕު އުޅެނީ ކުރީގަ އެވެ.

އެމެރިކާގެ މަޖިލީހުގެ އިންތިހާބުގެ ވޯޓުލުން ވެސް މިވަގުތު ކުރިއަށްދާއިރު މަތިގެ އާއި ތިރިގޭގެ ނަތީޖާތަކުން ވެސް ކުރީގައި އުޅެނީ ރިޕަބްލިކަން ޕާޓީ އެވެ. ސެނެޓުގެ 100 ގޮނޑީގެ ތެރެއިން ރިޕަބްލިކަން ޕާޓީއަށް 51 ގޮނޑި މިހާތަނަށް ލިބިއްޖެ އެވެ. ޑިމޮކްރެޓްސް އަށް ލިބުނީ 42 ގޮނޑި އެވެ. ތިރި ގޭގެ 435 ގޮނޑީގެ ތެރެއިން 176 ގޮނޑި ރިޕަބްލިކަން ޕާޓީއަށް މިހާތަނަށް ވަނީ ލިބިފަ އެވެ. ޑިމޮކްރެޓްސްއަށް ލިބުނީ 140 ގޮނޑި އެވެ.

މިއީ ޓްރަމްޕްް ރިޔާސީ އިންތިހާބު ކާމިޔާބު ކުރެއްވި ދެވަނަ ފަހަރެވެ. އޭނަ އެމެރިކާގެ ރައީސްކަން ފުރަތަމަ ކުރެއްވ 2016-2020 އަށެވެ. އަދި 2020 ގައި ދެވަނަ ދައުރަކަށް ވާދަކުރައްވައި ބަލިވެވަޑައިގަތީ މިހާރުގެ ރައީސް ޖޯ ބައިޑެންއާ ވާދަކޮށެވެ. ފާހަގަކޮށްލަން ޖެހޭ ކަމަކީ އެ ފަހަރު ވެސް އޭނަ އިންތިހާބު ކާމިޔާބު ކުރެއްވީ އަންހެން ކެންޑިޑޭޓަކާ ވާދަކުރައްވައިކަމެވެ.