ދިރާގުން ސައިބާ އެކްސްޕޯގެ ޑިޖިޓަލް ޕާޓްނަރަކަށް ސޮއިކޮށްފި

އަހުމަދު ނިހާން

11 ޑިސެމްބަރ 2024 - 15:37

0 comments

ސައިބާ އެކްސްޕޯގެ ޑިޖިޓަލް ޕާޓްނަރުގެ ގޮތުގައި ދިރާގުން ސޮއިކުރުން -- ފޮޓޯ/ ދިރާގު

ފުލުހުން ބާއްވާ ސައިބާ އެކްސްޕޯ 2024ގެ އެކްސްކްލޫސިވް ޑިޖިޓަލް ޕާޓްނަރުގެ ގޮތުގައި ދިރާގުން ސޮއިކޮށްފި އެވެ.

ހުޅުމާލެ ސެންޓްރަލް ޕާކުގައި މިއަދުން ފެށިގެން ހުކުރު ދުވަހުގެ ނިޔަލަށް އޮންނަ އެ އެކްސްޕޯގައި ސައިބާ ސެކިއުރިޓީގެ ދާއިރާއާ ގުޅޭ މީހުންނަށް ޕްލެޓްފޯމެއް ގާއިމުކޮށް، އެކި ސޮލިއުޝަންތަކާ ބެހޭ ގޮތުން މަޝްވަރާ ކުރުމަށް ވަނީ ހަމަޖެހިފަ އެވެ.

އެގޮތުން އެކްސްޕޯގައި ސައިބާ ސެކިއުރިޓީއާ ގުޅޭ މައުލޫމާތު ދިނުމަށް ޕެނަލް ޑިސްކަޝަންތަކާއި ސްޓޯލްތައް ހުންނާނެ އެވެ.

ދިރާގަކީ ސައިބާސެކިއުރިޓީއާ ގުޅުންހުރި ހޭލުންތެރިކަން ޕްރޮމޯޓްކޮށް، ފަހުގެ ޓެކްނޮލޮޖީ ތައާރަފުކުރުމަށް މަސައްކަތްކުރާ ކުންފުންޏެއްކަން އެ ކުންފުނިން ފާހަގަކުރިއެވެ.

އެ އެކްސްޕޯގައި ކީނޯޓް ސްޕީޗް ދެއްވާ ބޭފުޅުންގެ ތެރޭގައި ދިރާގުގެ ހެޑް އޮފް ސައިބާސެކިއުރިޓީ އިސްމާއީލް ފައިޒް ވެސް ހިމެނިވަޑައިގަންނަވާނެއެވެ. އެކްސްޕޯގެ ދެވަނަ ދުވަހު ދައްކަވާ ވާހަކައިގެ މައުޟޫއަކީ 'ދިރާގު ނެޓްޕްރޮޓެކްޓް: ސޭފްގާޑް ޔުއާ ޗައިލްޑްސް އޮންލައިން ވޯލްޑް' އެވެ. އަދި ދިރާގުގެ އުފެއްދުންތަކާއި ސައިބާސެކިއުރިޓީއާ ގުޅޭ މައުލޫމާތު ފޯރުކޮށްދީ، ވިޔަފާރިތަކުގެ ގުޅުން ބަދަހިކުރުމަށް ފަހިކޮށްދޭ ޚާއްސަ ސްޓޯލެއް ވެސް އެކްސްޕޯގައި ހުންނާނެއެވެ.