އާރްޓީއެލް ފެރީގެ ހިދުމަތް މި މަހު ރ. އަތޮޅުގައި ފަށަނީ

އިސްމާއިލް ރިޒާ

12 ޖޫން 2025 - 13:23

0 comments

މިއަހަރު ނިމޭއިރު ރާއްޖޭގެ ހުރިހާ އަތޮޅެއްގައި އާރުޓީއެލް ފެރީގެ ޚިދުމަތް ފެށުމަށް މަސައްކަތް ކުރަމުން އަންނަ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީގެ ސީއީއޯ އަހުމަދު ސައުދީ ވިދާޅުވެއްޖެ އެވެ.

ޕީއެސްއެމް ނިއުސްއަށް ދެއްވި ޚާއްސަ ބަސްދީގަތުމެއްގައި ސައުދީ ވިދާޅުވީ މި އަހަރު ނިމެންވާއިރަށް މުޅި ރާއްޖެއަށް އާރްޓީއެލް ފުޅާކުރުމަކީ ރައީސް ޑރ. މުހައްމަދު މުއިއްޒުގެ ވިސްނުންފުޅެއް ކަމަށެވެ.

"މިމަސް ނިމެންވާއިރަށް އަޅުގަނޑުމެންނަށް ރ. އަތޮޅުގައި އާރްޓީއެލްގެ މަސައްކަތް ފެއްޓޭނެ،" ސައުދީ ވިދާޅުވި އެވެ.

ދައުލަތުގެ މީޑިއާއަށް ދެއްވި އިންޓަވިއުއެއްގައި ސައުދީ ވިދާޅުވީ މި އަހަރުގެ ޖުލައި މަސް ނިމެންވާއިރަށް ބ. އަތޮޅުގައިވެސް އާރްޓީއެލްގެ ހިދުމަތް ފެއްޓޭނެ ކަމަށެވެ.

އާރްޓީއެލް ފެރީގެ ހިދުމަތް ފެށީ ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގަ އެވެ.

ރާއްޖޭގައި އާރުޓީއެލްގެ ހިދުމަތް ގާއިމުކުރަމުންދަނީ 3 ފިޔަވައްސަކަށް ބަހާލައިގެން 6 ސަރަހައްދެއްގަ އެވެ. މިހާތަނަށް 9 އަތޮޅެއްގެ 81 ރަށް ފެރީގެ ނިޒާމުން މިހާރު ގުޅާލާފައިވާއިރު މި މަހުގެ ތެރޭގައި ރ. އަތޮޅުގައި އާރުޓީއެލްގެ ޚިދުމަތް ފެށުމަށް އަންނަނީ ތައްޔާރުވަމުންނެވެ.

މީގެ އިތުރުން އަންނަ މަހު ބ. އަތޮޅުގައިވެސް އާރުޓީއެލްގެ ހިދުމަތް ފެށޭނެ ކަމަށް އެމްޓީސީސީގެ ސީއީއޯ އަހުމަދު ސައުދީ ވިދާޅުވި އެވެ.