ބިންތައް އިހުތިސާސުން ވަކިކުރުމުގެ ބާރު ކެބިނެޓަށް ދެނީ

އިސްމާއިލް ރިޒާ

05 އޯގަސްޓް 2026 - 09:52

0 comments

ސަރުކާރުން ބޭނުންވެއްޖެ ނަމަ މަޝްރޫއުތައް ހިންގަން، ކައުންސިލްތަކުގެ މިލްކުވެރިކަމުގެ ދަށުގައިވާ ބިންތައް އެ ކައުންސިލްތަކުން ވަކިކޮށް، ސަރުކާރަށް ނެގޭ ގޮތަށް ލާމަރުކަޒީ ގާނޫނަށް އިސްލާހެއް ހުށަހަޅައިފި އެވެ.

ރައްޔިތުންގެ މަޖިލީހަށް މި އިސްލާހު ހުށަހެޅުއްވީ އަމިއްލަ މެންބަރެއް ކަމަށްވާ ތުޅާދޫ ދައިރާގެ މެމްބަރު އަބްދުލް ހަންނާން އަބޫބަކުރު އެވެ. ހަންނާން މަޖިލީހަށް ހޮވުނީ އަމިއްލަ މެންބަރެއްގެ ގޮތުގައި ކަމަށްވީ ނަމަވެސް ފެށުނީއްސުރެ އޭނާ ގެންދަވަނީ ސަރުކާރާ އެކު މަޖިލީހުގައި މަސައްކަތް ކުރައްވަމުންނެވެ.

ހަންނާން ހުށަހެޅުއްވި ބިލްގެ މަގުސަދަކީ ސަރުކާރުން ކުރިއަށް ގެންދަން ބޭނުންވާ ތަރައްގީގެ މަޝްރޫއުތައް ހަލުވި ދުވެލީގައި ކުރިއަށް ގެންދިއުމަށް ކައުންސިލްތަކުގެ ފުރިހަމަ އެއްބާރުލުން ގާނޫނީ އޮނިގަނޑެއްގެ ތެރެއިން ކަށަވަރުކުރުން ކަމަށް ބުނެފައިވެ އެވެ.

އިސްލާހުގައިވާ ގޮތުން ކައުންސިލްގެ އިޚްތިސާސްގައި ހިމެނޭ ބިމެއްގައި އެއްވެސް މަޝްރޫއެއް ސަރުކާރުން ހިންގަން ބޭނުންވާނަމަ ކައުންސިލްގެ އިހްތިސާސް އިން އެ ބިމެއް ވަކިކުރުމަށް ވަޒީރުންގެ މަޖިލީހަށް ނިންމިދާނެ އެވެ. ވަޒީރުންގެ މަޖިލީހުގެ ނިންމުން، ދައުލަތުގެ ކަމާ ގުޅޭ އިދާރާއިން އެ ކައުންސިލަކަށް އެންގުމާއެކު، އެ ބިމެއް ސަރުކާރުގެ ފުރިހަމަ ބާރު ހިނގާ ތަނަކަށް ބަދަލުވާނެ ކަމަށްވެސް އިސްލާހުގައިވެ އެވެ.

ރަށެއްގައި ނުވަތަ ސިޓީއެއްގެ ފިޒިކަލް ޑިވެލޮޕްމަންޓް ޕްލޭން ފާސްކޮށް އަމަލުކުރަން ފެށުމުގެ ކުރިންވެސް ސަރުކާރުން ތަރައްގީގެ މަޝްރޫއަކަށް ބިމެއް ހޯދުމަށް އެދޭ ހާލަތުގައި އެ މަޝްރޫއަކަށް ބޭނުންވާ ބިން އެ ކައުންސިލަކުން ސަރުކާރުގެ ކަމާ ގުޅޭ އިދާރާއާ އެ ބިމެއް ހަވާލުކުރަން ވާނެ ކަމަށްވެސް އިސްލާހުގައި ކަނޑައަޅާފައިވެ އެވެ.

ރަށެއްގެ ނުވަތަ ސިޓީއެއްގެ ރައްޔިތުންގެ މަންފާއަށް ސަރުކާރުން ކުރިއަށް ގެންދާ މަޝްރޫއަކަށް އެއްވެސް މަގުބޫލު ސަބަބެއް ނެތި ހުރަސްއެޅޭ ގޮތަށް އަމަލުކުރުން ނުވަތަ އެފަދަ މަޝްރޫއުތައް ހުއްޓުމަށް މެދުވެރިވާ ފަދަ ނިންމުމެއް އެއްވެސް ކައުންސިލަކަށް ނުނިންމޭ ގޮތަށް ގާނޫނު ބަދަލުކުރަންވެސް އިސްލާހެއް ހުށަހަޅާފައިވެ އެވެ.

ގާނޫނަށް މި އިސްލާހު ހުށަހެޅިއިރު، ސަރުކާރުން ބޭނުންވާ މަޝްރޫއުތައް ހިންގަން ބިން ނުދީ ހިފެހެއްޓުން ފަދަ ކަންކަން ބައެއް ކައުންސިލްތަކުން ކުރަމުންދާ ކަމަށް ސަރުކާރުން ވަނީ ބުނެފަ އެވެ. އޭގެ ސަބަބުން ރަށްރަށުގެ ކުރިއެރުމަށް ހިންގަން ބޭނުންވާ ބައެއް މަޝްރޫއުތައް ލަސްވުމާއި ހުއްޓުން ފަދަ ކަންކަން ކުރިމަތިވެފައި ހުރި ކަމަށް ވެސް ސަރުކާރުން ބުނެފައިވެ އެވެ.